Ministrja e Shëndetësisë, Klodiana Spahiu, ka vizituar këtë të diel Shtëpinë e Foshnjës “Hannah dhe Rozafa”, ku është njohur nga afër me kujdesin që u ofrohet fëmijëve dhe kushtet në të cilat ata jetojnë.
Gjatë vizitës, vëmendje e veçantë i është kushtuar reformës së deinstitucionalizimit dhe zgjerimit të kujdesit alternativ, përmes së cilës synohet që më shumë fëmijë të kenë mundësinë të rriten në një mjedis familjar të sigurt.
Përmes një postimi në rrjetet sociale, Spahiu bëri të ditur se në këtë proces do të përfshihen 200 familje kujdestare, të cilat do të kontribuojnë në ofrimin e kujdesit dhe mbështetjes për fëmijët.
“Përmes reformës së deinstitucionalizimit dhe zgjerimit të kujdesit alternativ, ku do të përfshihen 200 familje kujdestare, synojmë që më shumë fëmijë të rriten në një mjedis familjar të sigurt, me kujdesin dhe mbështetjen që meritojnë”, shkroi ministrja.