Pirro Dhima ka paraqitur dorëheqjen nga detyra e këshilltarit të ministrit grek të Sportit, Yiannis Vroutsis, vetëm disa orë pas përfshirjes së emrit të vëllait të tij, Odiseas Dhima, në një skandal me steroide. Sipas mediave greke, vendimi i legjendës së peshëngritjes u mor për shkak të ndjeshmërisë, pas arrestimit të 58-vjeçarit që akuzohet për furnizim të sportistëve me substanca të ndaluara për rritjen e performancës.
Ministri i Sportit, Yiannis Vroutsis, nuk e ka pranuar dorëheqjen e Pirro Dhimës. Protothema.gr raporton se Vroutsis i tha se nuk mban përgjegjësi për veprimet e një familjari, duke iu përgjigjur: “Çfarë lidhje keni ju me këtë?”. Përveç kësaj detyre, Pirro Dhima vazhdon të mbajë postin e sekretarit special në Federatën Greke të Peshëngritjes.
Pirro Dhima njihet si një nga sportistët më të mëdhenj në historinë e peshëngritjes për Greqinë, duke fituar tre medalje të arta dhe një medalje bronzi në Lojërat Olimpike. Rasti i vëllait të tij ka ndikuar në gjendjen e tij emocionale, por deri tani ish-kampioni olimpik nuk ka bërë asnjë deklaratë publike lidhur me ngjarjen.
Autoritetet arrestuan Odiseas Dhimën mëngjesin e së enjtes, më 12 nëntor, në një zonë të Atikës, nën dyshimin për shkelje të legjislacionit antidoping. Arrestimi erdhi pas një hetimi disa mujor, të zhvilluar në bashkëpunim me Organizatën Helenike Antidoping (EOKAN) dhe Organizatën Kombëtare të Barnave (EOF). Ai është proceduar penalisht për një krim të rëndë dhe një kundërvajtje, ndërsa çështja i është referuar një hetuesi për vijimin e procedurave ligjore.
Lajmi për dorëheqjen e paraqitur dhe refuzimin e saj nga ministri theksohet nga mediat lokale, të cilat raportojnë edhe për vazhdimësinë e angazhimit të Pirro Dhimës brenda Federatës Greke të Peshëngritjes dhe për mungesën e një deklarate zyrtare nga ana e tij lidhur me hetimin ndaj vëllait.