Rreziku i humbjes së Bashkisë së Tiranës dhe nevoja për të larguar nga Partia Socialiste personat me lidhje të papërshtatshme me krimin e organizuar ishin dy shqetësimet që ish-kryeministri Pandeli Majko paraqiti në Asamblenë Kombëtare Socialiste.
Duke folur për garën në kryeqytet, Majko paralajmëroi se, në rrethanat aktuale, socialistët mund ta humbin bashkinë. Për këtë arsye, ai kërkoi përzgjedhjen e një kandidature serioze, me potencial për të siguruar fitoren.
Të lidhura
None found
Kryeministri Rama mori fjalën më pas dhe iu përgjigj këtij shqetësimi. Sipas tij, skepticizmi i vazhdueshëm i Majkos e ka nxitur të marrë vendimet e duhura, ndërsa shprehu bindjen se njësoj do të ndodhë edhe këtë herë për Tiranën.
Për shkëmbimin e batutave mes Majkos dhe Ramës gjatë diskutimit, një burim i pranishëm në asamble informoi gazetarin e Top Channel, Muhamed Veliu. Burimi tha se në qendër të ndërhyrjes së ish-kryeministrit ishte domosdoshmëria për një Parti Socialiste të shëndetshme.
Në kërkesën që ia drejtoi hapur Ramës dhe Asamblesë, Majko u shpreh se çdo pjesëtar i familjes socialiste që ka pasur kontakte të papërshtatshme dhe diskredituese me krimin e organizuar duhet të largohet pa vonesë, në mënyrë që PS-ja të mos përballet me kosto.
Gjatë mbledhjes së zhvilluar një ditë më parë, ai citohet ta ketë lidhur këtë thirrje me informacionin e bërë publik për 1000 orë filmime që ndodhen në duart e SPAK-ut. Sipas Majkos, këto materiale mund të komprometojnë persona të caktuar brenda partisë.
Ish-kryeministri kërkoi gjithashtu që socialistët të mbajnë parasysh veprimet që SPAK mund të ndërmarrë deri në maj, muaj në të cilin zhvillohen zgjedhjet lokale.
