Një ndeshje miqësore mes New York Red Bulls dhe skuadrës meksikane América përfundoi në kaos, pasi në minutat e fundit shpërtheu një përleshje masive mes futbollistëve të të dyja ekipeve.
Ndeshja, e zhvilluar në New Jersey, përfundoi me fitoren 1-0 të ekipit amerikan, por rezultati mbeti në plan të dytë pas incidentit të rëndë që ndodhi në minutën e 85-të.
Gjithçka nisi pas një faulli pranë vijës së portës. Një debat verbal mes lojtarëve u përshkallëzua shpejt në shtyrje dhe më pas në shkëmbim goditjesh. Në përleshje u përfshinë futbollistë nga të dyja skuadrat, ndërsa shokët e ekipit dhe anëtarët e stafit teknik u përpoqën të qetësonin situatën.
Një nga momentet më të rënda të incidentit u regjistrua kur Andy Rojas, futbollist i New York Red Bulls, goditi në pjesën e pasme të kokës Dagoberto Espinozën e América.
Pas rikthimit të qetësisë, gjyqtari ndëshkoi me kartonë të kuq pesë futbollistë. Ronald Donkor dhe Nehuen Benedetti u përjashtuan nga skuadra vendase, ndërsa Emilio Lara, Ramón Juarez dhe Dagoberto Espinoza u larguan nga loja te América.
Situata u tensionua edhe më shumë kur disa tifozë nga tribunat nisën të hedhin objekte në fushë. Pamjet e përleshjes u shpërndanë me shpejtësi në rrjetet sociale, ndërsa ende nuk dihet nëse Andy Rojas do të përballet me ndonjë masë disiplinore për veprimin e tij.
Pas ndeshjes, trajneri i New York Red Bulls, Michael Bradley, nuk shfaqi shqetësim të tepruar për incidentin, duke theksuar se edhe në ndeshjet miqësore futbollistët hyjnë në fushë me dëshirën për të fituar.
“Dëgjon njerëz që thonë se nuk ka miqësore të vërteta. Lojtarët ende duan të garojnë dhe të fitojnë, pavarësisht se çfarë lloj ndeshjeje është. Kjo është pjesë e futbollit në netë të caktuara”, deklaroi Bradley. /Telegrafi/
