Nga Nano e Kokëdhima te Spiropali, lista e socialistëve që Rama “i krasiti” nga partia

Largimi i Elisa Spiropalit dhe Plarent Ndrecës nga forumet drejtuese të Partisë Socialiste ka rikthyer në vëmendje historinë e gjatë të përplasjeve dhe ndryshimeve brenda kësaj force politike, që prej marrjes së drejtimit nga Edi Rama.

Gjatë viteve, disa prej figurave më të njohura të së majtës kanë humbur pozicionet në strukturat drejtuese ose në grupin parlamentar, pas mosmarrëveshjeve politike, qëndrimeve të kundërta apo përplasjeve me drejtimin e partisë.

Një nga rastet më të hershme ishte ai i Fatos Nanos. Në vitin 2007, Rama, asokohe kryetar i PS-së, deklaroi se ish-kryeministri nuk ishte më pjesë e projektit politik të socialistëve.

Po atë vit, gjashtë deputetë socialistë – Paulin Sterkaj, Durim Lamaj, Durim Hushi, Bukurosh Stafa, Taulant Dedja dhe Hamit Kosta – u përjashtuan nga grupi parlamentar, pasi votuan në favor të Bamir Topit për President të Republikës, në kundërshtim me qëndrimin e partisë.

Nga Kastriot Islami te Tom Doshi dhe Saimir Tahiri

Në vitin 2011, Kastriot Islami u përjashtua nga Grupi Parlamentar i PS-së, pas përplasjes për qëndrimin politik të partisë. Në të njëjtën periudhë, kritikat ndaj drejtimit të socialistëve u artikuluan edhe nga figura të tjera, si Ben Blushi, Arben Malaj, Andis Harasani dhe Marko Bello, të lidhur me Lëvizjen për Mendim Ndryshe.

Përplasjet vijuan edhe në vitet pasuese. Në vitin 2015, Tom Doshi u përjashtua nga grupi parlamentar i PS-së, ndërsa një vit më vonë Koço Kokëdhima humbi funksionet drejtuese në parti.

Në vitin 2017, radhën e pati ish-ministri i Brendshëm Saimir Tahiri, i cili u largua nga grupi parlamentar dhe forumet e Partisë Socialiste.

Lista vijoi në vitin 2021 me Dritan Lelin, i cili u përjashtua nga PS-ja pas përplasjes me drejtimin e partisë.

Spiropali dhe Ndreca, rasti më i fundit

Rasti më i fundit është ai i Elisa Spiropalit dhe Plarent Ndrecës. Pas mbledhjes së Asamblesë Kombëtare të PS-së, Sekretari i Përgjithshëm, Blendi Klosi, bëri të ditur largimin e tyre nga forumet drejtuese të partisë.

Ndryshe nga disa prej rasteve të mëparshme, Spiropali dhe Ndreca nuk janë përjashtuar nga Partia Socialiste. Ata mbeten anëtarë të saj, por nuk do të jenë më pjesë e strukturave drejtuese.

Në të njëjtën mbledhje, Edi Rama vendosi edhe largimin e Erion Veliajt nga drejtimi politik i PS-së në Tiranë. Në vend të kryebashkiakut u emëruan si bashkëdrejtues Ervin Demo dhe Albana Koçiu, ndërsa Veliaj mbeti anëtar i thjeshtë i partisë.

Kronologjia e përplasjeve dhe largimeve në PS:

• 2007 – Fatos Nano: Rama deklaron se ish-kryeministri nuk është më pjesë e projektit politik të PS-së.
• 2007 – Gjashtë deputetë socialistë: Paulin Sterkaj, Durim Lamaj, Durim Hushi, Bukurosh Stafa, Taulant Dedja dhe Hamit Kosta përjashtohen nga grupi parlamentar pas votës pro Bamir Topit.
• 2011 – Kastriot Islami: Përjashtohet nga Grupi Parlamentar i PS-së.
• 2015 – Tom Doshi: Përjashtohet nga grupi parlamentar.
• 2016 – Koço Kokëdhima: Humb funksionet drejtuese në PS.
• 2017 – Saimir Tahiri: Largon nga grupi parlamentar dhe forumet e partisë.
• 2021 – Dritan Leli: Përjashtohet nga Partia Socialiste.
• 2026 – Elisa Spiropali dhe Plarent Ndreca: Largohen nga forumet drejtuese, por mbeten anëtarë të PS-së.

Përplasjet e këtyre viteve kanë pasur rrethana dhe shkaqe të ndryshme, por kanë lënë gjurmë në organizimin e brendshëm të Partisë Socialiste dhe në raportet mes drejtimit të saj dhe figurave politike që kanë qenë pjesë e kësaj force.