Autoritetet italiane kanë gjobitur me 805 milionë euro kompaninë Meta, mëmë e Facebook-ut, për përdorimin e fotografive dhe videove nga telefonat Android pa pëlqimin e posaçëm të përdoruesve, njoftoi të shtunën Autoriteti Italian për Mbrojtjen e të Dhënave Personale në një deklaratë.
Gjobitja lidhet me funksionin “Sugjerimet nga galeria e kamerës gjatë shfletimit në Facebook”, i cili u sugjeron përdoruesve fotografi dhe video nga galeria e telefonit për t’i shtuar në postimet e tyre, shkruan Politico.
Sipas autoritetit, ky funksion shkel ligjin italian që zbaton direktivën e BE-së për privatësinë në komunikimet elektronike (ePrivacy). Kjo është, me diferencë, gjoba më e madhe e vendosur ndonjëherë nga rregullatori italian.
Hetimi, i nisur në vitin 2025, konstatoi se aplikacioni kërkon qasje në galerinë e fotografive të përdoruesit përmes një autorizimi të vetëm, i cili mbulon të gjithë aplikacionin, megjithëse funksionet e ndryshme të tij kanë nevoja të ndryshme. Sipas autoritetit, kërkesa për autorizim paraprihej nga një njoftim i përgjithshëm, i cili nuk u mundësonte përdoruesve të kuptonin se po autorizonin sugjerimin e fotografive dhe videove.
“Nëse jepet plotësisht, ky lloj autorizimi i lejon aplikacionit të lexojë të gjithë arkivin e fotografive të pajisjes, zakonisht në mënyrë të përhershme, pa pasur mundësi përdoruesi apo autoritetet të verifikojnë se cilat të dhëna po përdoren konkretisht”, thuhet në deklaratë.
Autoriteti tha gjithashtu se “hodhi poshtë kundërshtimin e kompanisë për mungesë juridiksioni, sipas të cilit çështja duhej të trajtohej nga autoriteti irlandez, pasi rregullorja ePrivacy nuk parashikon mekanizmin e ‘sportelit të vetëm’ (one-stop-shop)”.
Sipas autoritetit, Meta ka 60 ditë kohë për të marrë pëlqimin e përdoruesve veçmas dhe në mënyrë të posaçme për këtë funksion, si dhe për të shpjeguar qartë se si funksionon dhe si mund të çaktivizohet. Funksioni duhet gjithashtu të jetë i çaktivizuar si parazgjedhje, edhe për përdoruesit që e kanë autorizuar më parë.
Meta nuk iu përgjigj menjëherë një kërkese për koment. Kompania ka të drejtë ta apelojë vendimin.
