Policia e Durrësit ka arrestuar dy shtetas dhe ka proceduar penalisht në gjendje të lirë nëntë të tjerë, pasi qëlluan me vezë në drejtim të eskortës së kryeministrit Edi Rama.
Incidenti ka ndodhur më 14 nëntor, rreth orës 10:00, në Kameras, në aksin rrugor Maminas–Gjiri i Lalzit, kur një grup personash ka tentuar të bllokojë rrugën dhe ka hedhur vezë e sende të forta në drejtim të eskortës së kryeministrit.
Për veprën penale “goditje për shkak të detyrës” janë arrestuar E. L. (28) dhe A. D. (37), banues në Tiranë. Ndërsa për veprën penale “prishja e qetësisë publike” janë proceduar penalisht në gjendje të lirë: E. P. (33), D. G. (50), O. D. (34), M. C. (28), L. A. (24), I. R. (31), N. S. (23) dhe J. S. (25), të gjithë banues në Tiranë dhe I. Ll. (27), banues në Fier.
Materialet procedurale janë dërguar Prokurorisë pranë Gjykatës së Shkallës së Parë të Juridiksionit të Përgjithshëm Durrës, e cila do të vazhdojë me hetimet.