Ford ka prezantuar një koleksion të pazakontë që përfshin mbi 100 vetura historike, prototipe të rralla dhe modele eksperimentale. Disa prej tyre nuk janë shfaqur më parë para publikut.
I quajtur Ford Vault, koleksioni është vendosur në një ish-qendër magazinimi të Amazonit, mes Ann Arbor dhe Detroit, në shtetin amerikan të Michiganit.
Të lidhura
None found
Krahas modeleve të njohura të Fordit, aty ruhen edhe automjete të përdorura në testime, të cilat fillimisht ishte parashikuar të shkatërroheshin. Kjo e dallon hapësirën nga muzetë tradicionalë të automobilave.
Mes tyre është një Ford Mustang GT eksperimental me motor V10. Automjeti u përdor gjatë zhvillimit të modeleve Cobra R dhe Ford GT.
Përfaqësues të kompanisë thonë se kjo veturë u mbajt e fshehur për vite me radhë në magazina, në mënyrë që të mos shkatërrohej. Ford e ka modernizuar kohët e fundit dhe vijon ta përdorë për punë inxhinierike.
Pjesë e koleksionit janë edhe një Ford Contour SVT i vitit 2000, një kamionçinë Ford e vitit 1934 në pronësi të Jay Lenos, si dhe konceptet Ford Cougar II dhe SYNus.
Për herë të parë po shfaqet gjithashtu një model i hershëm i Ford Bronco, i ndërtuar gjatë përpjekjeve për ta rikthyer këtë automjet në treg.
Ford synon t’ia hapë koleksionin publikut, ndërsa për momentin po bashkëpunon me autoritetet lokale për të plotësuar kërkesat ligjore dhe ato të sigurisë. Nuk është njoftuar ende se kur vizitorët do të mund t’i shohin nga afër automjetet e rralla.
