Cardi B u bë një nga personazhet më të komentuar në mbrëmjen gala të organizatës “Baby2Baby” në Los Angeles. Reperja amerikane u paraqit me një stil aq të veçantë, sa në pamje të parë ishte e vështirë të dallohej se kush fshihej pas tij.
Kapele e stërmadhe me pupla i mbulonte thuajse të gjithë fytyrën, ndërsa një korse me dekolte të theksuar nxirrte në pah format e këngëtares. Kombinimi tërhoqi vëmendjen e të pranishmëve dhe të ndjekësve të modës: disa e njohën nga hollësitë e veshjes, kurse të tjerë vunë në dukje se duhej guxim për ta provuar një paraqitje të tillë.
Të lidhura
None found
Veshja ishte krijuar nga stilistja australiane Tamara Ralph dhe përbëhej nga kapela me pupla dhe korseja karakteristike. Identiteti i yllit u bë i qartë kur Cardi B u ndërrua, veshi një fustan të zbukuruar me rruaza dhe më pas doli në skenë për të performuar.

Gala e “Baby2Baby” mbahet çdo vit për të mbledhur fonde dhe për të mbështetur fëmijët që jetojnë në varfëri.

Në mbrëmje morën pjesë edhe figura të tjera të njohura ndërkombëtare. Katy Perry parakaloi në tapetin e kuq bashkë me partnerin e saj, ish-kryeministrin kanadez Justin Trudeau. Mes të ftuarve ishte edhe aktorja Elizabeth Hurley, e shoqëruar nga muzikanti Billy Ray Cyrus.


Demi Moore mori çmimin “The Giving Tree Award”, që vlerëson gratë të cilat shfrytëzojnë famën dhe ndikimin e tyre për të përmirësuar jetën e fëmijëve në nevojë.









