E hënë, 16 nëntor 2026 DENONCO ANONIM Denonco: +355 69 20 95 843
PUBLIK PUBLIK
“Klloun i propagandës ruse”, Rama shpërthen keq ndaj gazetarit irlandez
Lajme

“Klloun i propagandës ruse”, Rama shpërthen keq ndaj gazetarit irlandez

Kryeministri Edi Rama ka sulmuar publikisht gazetarin irlandez Chay Bowes, pasi ky i fundit publikoi në rrjetet sociale pamje nga protestat në Tiranë, duke pretenduar se kryeqyteti shqiptar po përjetonte trazira dhe përplasje me policinë.

Në reagimin e tij, Rama përdori gjuhë të ashpër ndaj gazetarit, duke e akuzuar për përhapje të propagandës ruse dhe duke iu referuar vendimit të fundit të Bashkimit Europian për vendosjen e sanksioneve ndaj tij.

“Ja dhe një klloun i propagandës ruse që sot u sanksionua nga Bashkimi Europian pikërisht si klloun i paguar nga Rusia”, shkruan kryeministri.

Rama ngriti gjithashtu pikëpyetje për arsyen pse Shqipëria është bërë objekt i publikimeve të Bowes, duke e lidhur këtë me ecurinë e procesit të integrimit europian.

“Po me Shqipërinë pse? Se Shqipëria e teproi me ngjitjen e saj lart dhe afrimin e shpejtë te objektivi historik: Anëtarësimi në Bashkimin Europian”, u shpreh kreu i qeverisë.

Reagimi vjen pasi Bowes kishte publikuar pamje nga protestat në Tiranë, të shoqëruara me pretendime për kaos, zjarre dhe përplasje me policinë, si dhe me thirrjet e qytetarëve për largimin e Ramës nga detyra.

Sanksionet e BE-së ndaj gazetarit irlandez

Më 16 nëntor, ministrat e Jashtëm të vendeve anëtare të Bashkimit Europian njoftuan vendosjen e masave kufizuese ndaj Chay Bowes, i cili punon për televizionin rus RT.

Sipas arsyetimit të autoriteteve europiane, gazetari dyshohet se ka marrë pjesë në manipulimin e informacionit dhe përhapjen e narrativave që mbështesin ose legjitimojnë luftën e Rusisë kundër Ukrainës.

Masat përfshijnë ngrirjen e aseteve të tij në territorin e BE-së, kufizime financiare dhe ndalim udhëtimi. Në të njëjtën listë janë përfshirë edhe prezantuesit e televizioneve ruse Vitaly Eliseev dhe Petr Marchenko, si dhe blogeri dhe komentatori ushtarak Yurii Podoliaka.

Bowes është një nga themeluesit dhe ish-aksionarët e platformës informative irlandeze “The Ditch”. Ai e prezanton veten si gazetar, shkrimtar dhe prezantues.

Në vitin 2023, gazetari u ftua nga Rusia të mbante një fjalim përmes videolidhjes në Këshillin e Sigurimit të Kombeve të Bashkuara. Gjatë ndërhyrjes së tij, ai kritikoi furnizimet ushtarake të vendeve perëndimore për Ukrainën dhe fajësoi NATO-n për konfliktin.

Ndërkohë, ministrja e Jashtme e Irlandës, Helen McEntee, ka deklaruar se vendimi për sanksionet vjen në kuadër të diskutimeve për masat e mëtejshme kufizuese të Bashkimit Europian ndaj Rusisë.

Na ndiqni në YouTubeVideo, intervista dhe transmetime nga PUBLIK TV Abonohu

Keni një histori? Denonco anonimisht, identiteti juaj mbrohet.

Denonco
DENONCO

Zëri yt bëhet lajm.

Bëhu pjesë aktive e Publik.al. Raporto çdo padrejtësi, korrupsion apo ngjarje, me foto dhe video. Identiteti yt mbrohet nga redaksia.