Me Romelu Lukakun që i ka dhënë lamtumirën kombëtares, Kevin De Bruyne mbetet i vetmi përfaqësues aktiv i një gjenerate që la gjurmë në futbollin botëror.

Një epokë e artë e futbollit belg po shkon drejt fundit. Brezi që e shndërroi Belgjikën në një prej kombëtareve më të frikshme të futbollit europian është shpërbërë pothuajse tërësisht, ndërsa Kevin De Bruyne mbetet i fundit në këmbë. Lamtumira e Romelu Lukakut nga kombëtarja është një tjetër kapitull që mbyllet për “Djajtë e Kuq”. Pas tij, në këtë brez të artë kanë qenë emra të mëdhenj si Eden Hazard, Dries Mertens, Jan Vertonghen, Toby Alderweireld dhe Axel Witsel, të cilët tashmë janë larguar nga përfaqësuesja.

Edhe Thibaut Courtois, një tjetër simbol i kësaj gjenerate, aktualisht është në një periudhë pushimi nga kombëtarja.
Megjithatë, De Bruyne nuk ka ndërmend të largohet ende. Mesfushori 35-vjeçar ka shprehur dëshirën për të vazhduar të luajë me Belgjikën, për sa kohë që ndihet mirë fizikisht dhe ruan motivimin për të përfaqësuar vendin e tij.

Kështu, një prej brezave më të talentuar në historinë e futbollit belg po shuhet gradualisht. Një gjeneratë që arriti kulmin me vendin e tretë në Botërorin e vitit 2018 në Rusi, por që nuk arriti të fitonte një trofe madhor. Tashmë, De Bruyne mbetet simboli i fundit i një epoke që la gjurmë në futbollin europian.