Mbështete KOHËN. Ruaje të vërtetën
Showbiz

Gerard Depardieu tërheq apelin ndaj dënimit për sulm seksual dhe u kërkon falje viktimave

Gerard Depardieu

Gerard Depardieu

Foto: Associated Press

Aktori i njohur francez, Gerard Depardieu, ka tërhequr apelin kundër dënimit për sulm seksual ndaj dy grave gjatë xhirimeve të një filmi në vitin 2021. Për herë të parë, ai u ka kërkuar falje publike grave që e denoncuan, ka shkruar The Guardian.

“Jam shpallur fajtor. E dëgjoj këtë vendim dhe e pranoj. U kërkoj falje të thellë dhe të sinqertë të gjitha atyre që kanë vuajtur”, thuhet ne deklaratë me shkrim të 77-vjeçarit.

Aktori ka pranuar se për një kohë të gjatë ishte fshehur pas provokimeve dhe humorit të papërshtatshëm në sheshxhirime. Ai ka thënë se tashmë e kupton se fjalët dhe disa nga veprimet e tij kanë pasur pasoja, sidomos duke pasur parasysh pozitën e tij të fuqishme në industrinë e filmit.

“Edhe nëse nuk kam pasur kurrë qëllim t’i lëndoj gratë me të cilat jam përballur, kam kuptuar se qëllimi nuk e ndryshon dëmin e shkaktuar”, u shpreh ai.

Depardieu u shpall fajtor vitin e kaluar për sulm seksual ndaj një gruaje që merrej me dekorin 55-vjeçare dhe një ndihmësregjisoreje 35-vjeçare, gjatë xhirimeve të filmit “Les Volets Verts” në Paris, në shtator të vitit 2021.

Edhe Russell Brand shpallet fajtor për përdhunim dhe tri raste të sulmit seksual Showbiz Russell Brand shpallet fajtor për përdhunim dhe tri raste të sulmit seksual

Me tërheqjen e apelit, dënimi me kusht mbetet në fuqi, ndërsa emri i aktorit do të regjistrohet në regjistrin francez të personave të dënuar për vepra seksuale.

Njëra nga gratë, e identifikuar në media si Amelie, ka thënë se kishte pritur prej vitesh këtë kërkimfalje, por se do të kishte preferuar që aktori ta kishte bërë personalisht në gjykatë.

“Përbindëshi i kinemasë ka rënë”, ka deklaruar gruaja tjetër, e identifikuar si Sarah.

Dënimi i Depardieu u konsiderua një moment i rëndësishëm për lëvizjen #MeToo në Francë. Ai u bë figura më e njohur e industrisë franceze të filmit e dënuar për sulm seksual, pas vitesh kritikash ndaj mënyrës se si vendi i kishte trajtuar akuzat e grave për abuzim.

Aktori i kishte mohuar më parë të gjitha akuzat dhe kishte kritikuar ashpër lëvizjen #MeToo. Gjatë gjyqit, ai pretendoi se mediat po i përdornin akuzat për të dëmtuar reputacionin e tij.

Edhe Russell Brand mohon të gjitha akuzat për përdhunim dhe sulm seksual Showbiz Russell Brand mohon të gjitha akuzat për përdhunim dhe sulm seksual

Ndërkohë, Depardieu përballet edhe me një çështje tjetër gjyqësore. Ai ka apeluar vendimin që e detyron të dalë në gjyq për akuzat për përdhunim dhe sulm seksual ndaj aktores Charlotte Arnould, në banesën e tij në Paris, në vitin 2018. Gjykata pritet të vendosë këtë muaj nëse procesi do të vazhdojë vitin e ardhshëm.

Në muajin dhjetor të vitit 2023, presidenti francez Emmanuel Macron kishte dalë në mbrojtje të aktorit, duke deklaruar se Depardieu “e bën Francën krenare”, pavarësisht hetimeve dhe akuzave ndaj tij.