Sot shpallet aktgjykimi ndaj Thaçit dhe katër të tjerëve në rastin për pengim të drejtësisë
Dhomat e Specializuara të Kosovës (DhSK) në Hagë do ta shpallin sot, të martën, më 17 nëntor 2026, aktgjykimin në rastin kundër ish-presidentit Hashim Thaçi dhe katër të akuzuarve të tjerë, Bashkim Smakajt, Isni Kilajt, Fadil Fazliut dhe Hajredin Kuçit, të cilët ngarkohen për vepra penale kundër administrimit të drejtësisë.
Seanca për shpalljen e aktgjykimit është caktuar të fillojë në orën 10:00, sipas njoftimit të Gjykatës Speciale.
Vendimi për caktimin e datës së shpalljes së aktgjykimit është marrë nga gjykatësi i vetëm i çështjes, Christopher Gosnell, më 12 tetor 2026.
Në këtë rast, fjalët përfundimtare të palëve në procedurë janë paraqitur më 14 shtator 2026, duke përmbyllur kështu fazën e gjykimit.
Në seancën fillestare, të mbajtur më 27 shkurt 2026, të pesë të akuzuarit ishin deklaruar të pafajshëm për veprat penale që u vihen në barrë.
Kjo çështje gjyqësore lidhet me pretendimet për vepra penale kundër administrimit të drejtësisë, ndërsa Thaçi vazhdon të mbahet në paraburgim në Hagë, ku ndodhet që nga nëntori i vitit 2020.
Ndryshe, më 16 shtator 2026, Gjykata Speciale shpalli aktgjykimin në rastin kryesor për krime lufte ndaj ish-krerëve të UÇK-së. Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet, ndërsa Rexhep Selimi me 13 vjet burgim.















