Prokuroria kërkon burg për Fredi Kokoneshin dhe tre të pandehurit e tjerë
Prokuroria ka kërkuar dënimin me burg dhe ndalimin e ushtrimit të funksioneve publike për ish-kryetarin e Bashkisë së Divjakës, Fredi Kokoneshin, si dhe tre persona të tjerë, të cilët akuzohen për veprën penale të “Shpërdorimit të detyrës”, të kryer në bashkëpunim.
Në pretencën e saj, organi i akuzës ka kërkuar që Kokoneshi të dënohet me 1 vit burgim. Krahas kësaj mase, për ish-zyrtarin vendor është kërkuar edhe ndalimi i ushtrimit të funksioneve publike për një periudhë 3-vjeçare.
Të njëjtën akuzë, për shpërdorim detyre në bashkëpunim, Prokuroria ia atribuon edhe Dorjan Spahos, Andi Bullarit dhe Ledio Xharos, për të cilët ka paraqitur kërkesa të veçanta dënimi.
Konkretisht, për secilin prej tre të pandehurve të tjerë është kërkuar nga 1 vit burgim, si dhe ndalimi i ushtrimit të funksioneve publike për një periudhë 2-vjeçare.
Tashmë pritet që gjykata të shqyrtojë kërkesat e Prokurorisë dhe të japë vendimin përfundimtar për katër të pandehurit. Deri në një vendim të formës së prerë, ata prezumohen të pafajshëm.
Keni një histori? Denonco anonimisht, identiteti juaj mbrohet.
Denonco



