Avokati Plarent Ndreca është paraqitur sot në Gjykatën e Posaçme, ku pritet të zhvillohet seanca e radhës në procesin gjyqësor ndaj kryebashkiakut të Tiranës, Erion Veliaj.
Në seancën e kaluar, gjykata lexoi një shkresë të dërguar nga Veliaj prej paraburgimit të Fierit, përmes së cilës ai kundërshtonte transferimin nga paraburgimi i Tiranës drejt atij të Fierit.
Në dokumentin e tij, Veliaj pretendonte se ishte transferuar pa u informuar paraprakisht dhe pa iu bërë e ditur se ku do të dërgohej. Ai theksonte se me këtë vendim ishte larguar rreth 100 kilometra nga gjykata ku po zhvillohet procesi ndaj tij, por edhe nga bashkëshortja, dy fëmijët e mitur dhe nëna e tij pensioniste.
Po ashtu, kryebashkiaku pretendonte se ministri i Drejtësisë, Toni Gogu, e kishte vizituar pas transferimit në Fier dhe i kishte thënë se ky veprim ishte kryer me urdhër personal të kryeministrit Edi Rama.
Ndaj tij rëndojnë 13 akuza të rënda penale, 9 nga të cilat janë për korrupsion, të tjerat janë për shpërdorim detyre, pastrim të produkteve të veprës penale, fshehje të pasurisë dhe futjen e sendeve të ndaluara në qeli.
Kryebashkiaku i arrestuar i Tiranës, Erion Veliaj, së fundi ka filluar të grindet me kryeministrin Edi Rama, duke kërkuar mocion mosbesimi, komision hetimor parlamentar duke gënjyer për kërcënime apo ndërhyrje, të gjitha këto me qëllimin për të politizuar çështjen për në Strasburg.
Por nga ana tjetër prej një viti e 5 muaj, Erion Veliaj nuk shkon të gjykohet dhe të përballet me 13 akuzat e rënda që prokurorët kanë gjetur në mbi 60 mijë faqet që përmbajnë fakte dhe prova kundër kryebashkiakut.
Veliaj nuk ka guximin të përballet me drejtësinë dhe prej një viti e 5 muaj ka shtyrë seancat duke përdorur skema të ndryshme me avokatë që dorëhiqen, që kthehen sërish, me avokatë të zgjedhur kryesisht, së fundi ka avokat të pandehurin Plarent Ndreca, i cili herë shkon, herë nuk shkon as vetë në seancë, duke bërë që seancat të shtyhen pambarimisht.
Nga pastrimi i parave te rreziku i humbjes së kursimeve, sa të sigurta janë bankat dixhitale?
Gjyqi ndaj tij tashmë do të kishte përfunduar nëse nuk do të shtyhej pambarimisht nga Veliaj, avokati i tij i pandehur Plarent Ndreca dhe kompanitë e lobimit që prej më shumë se një viti kanë shpikur skenarë të ndryshëm për të shtyrë seancat që i pandehuri me 13 akuza të rënda penale të mos gjykohet.










