
Kryebashkiaku i Tiranës, Erion Veliaj, ka kërkuar për herë të parë që prej muajit shkurt të këtij viti të marrë pjesë në seancën gjyqësore ndaj tij në Gjykatën e Posaçme.
Përmes një letre drejtuar gjykatës, ai ka kërkuar shtyrjen e seancës, duke argumentuar se gjendja e tij shëndetësore dhe mungesa e dokumentacionit mjekësor e pengojnë të jetë i pranishëm në proces.
“Për shkak të gjendjes shëndetësore, për të cilën më është rekomanduar ndërhyrje kirurgjikale, prej 10 ditësh kërkoj dokumentacionin mjekësor, por nuk më është dhënë asnjë shpjegim. Kjo situatë më pengon të marr pjesë në gjykim dhe kërkoj që seanca gjyqësore të shtyhet”, thuhet ndër të tjera në letrën e Veliajt.
Gjatë seancës, prokurori Altin Dumani deklaroi se Prokuroria nuk disponon dokumentacion mjekësor që të pasqyrojë gjendjen shëndetësore të kryebashkiakut.
“Ne nuk kemi asnjë relacion mjekësor nga mjeku i burgut që të na përshkruajë gjendjen shëndetësore të Veliajt. Nuk kemi asnjë dokument konkret mbi gjendjen e tij, që të jemi të qartë”, deklaroi Dumani.
Nga ana tjetër, avokati Plarent Ndreca kundërshtoi qëndrimin e prokurorit, duke theksuar se Prokuroria është e informuar për gjendjen shëndetësore të Veliajt.
Sipas tij, klienti i tij kërkon informacion mbi gjendjen e këmbës dhe grafitë për t’i konsultuar me një mjek, por nuk i vihet në dispozicion kartela mjekësore.
“Prokuroria është e informuar mbi gjendjen shëndetësore të Veliajt. Këtë thotë edhe i pandehuri. Ai kërkon informacion mbi gjendjen reale të këmbës dhe grafitë për t’i konsultuar me një mjek. Nuk i jepet kartela mjekësore. Veliaj e ka shprehur vullnetin për të marrë pjesë në seancë”, tha Ndreca.
Gjykata është tërhequr për të marrë vendim mbi kërkesën e Veliajt për shtyrjen e seancës dhe për të vendosur mbi vijimin e procesit gjyqësor.
