Sekuestrohen pasuritë e biznesmenit të dënuar për trafik droge në Itali
Prokuroria e Tiranës ka kërkuar dhe realizuar sekuestrimin e një sërë pasurish të luajtshme dhe të paluajtshme që lidhen me biznesmenin Ilir Shehu, i njohur edhe me identitetin Ilir Pasholli, i cili është nën hetim për dyshime mbi përfshirjen në një skemë kontrabande të produkteve farmaceutike nga Italia drejt Shqipërisë.
Masa e sekuestrimit prek disa subjekte tregtare të sektorit farmaceutik, mes tyre “Medicamenta” sh.p.k., “Mega Store” sh.p.k., “Unipharma” sh.p.k. dhe “Italialbania Pharma” sh.p.k. Në listën e pasurive të identifikuara nga hetimi përfshihen gjithashtu tetë prona të paluajtshme në emër të Shehut, prona të tjera të regjistruara në emër të personave dhe subjekteve të lidhura me të, si dhe tetë automjete.
Procedimi pasuror me numër 23 është regjistruar pas materialeve të referuara nga Drejtoria e Përgjithshme e Policisë së Shtetit, mbi dyshimet se Shehu dhe persona të lidhur me të kanë krijuar pasuri përmes veprimtarive kriminale.
Skema e dyshuar: Barnat bliheshin në Itali, por deklaroheshin pjesërisht në Shqipëri
Sipas hetimeve të Prokurorisë, autoritetet italiane kishin identifikuar Ilir Shehun si person të përfshirë në një skemë të dyshuar të kontrabandimit të produkteve farmaceutike mes dy vendeve.
Mekanizmi i funksionimit të saj lidhej me manipulimin e deklarimeve doganore. Barnat bliheshin fillimisht në Itali me fatura të rregullta, ku pasqyroheshin më shumë se 10 artikuj të ndryshëm farmaceutikë. Në momentin e eksportimit, dokumentacioni paraqitej në doganën italiane me vlerën dhe peshën reale të mallrave.
Ndërhyrja e dyshuar ndodhte në doganën shqiptare. Sipas organit të akuzës, megjithëse pesha dhe vlera e ngarkesës mbeteshin të njëjta, lista e produkteve shkurtohej, duke deklaruar vetëm katër ose pesë artikuj. Pjesa tjetër e barnave dyshohet se futej në tregun shqiptar pa dokumentacionin përkatës.
Hetuesit kanë evidentuar gjithashtu dyshime se një pjesë e produkteve legalizoheshin më pas përmes një operatori tjetër, me qëllim mbulimin e origjinës së tyre dhe fshehjen e gjurmëve të skemës së kontrabandës.
Prokuroria: Pasuria dyshohet se është krijuar nga aktiviteti kriminal
Në materialin hetimor ngrihen dyshime edhe mbi burimin e pasurisë së krijuar nga biznesmeni. Sipas Prokurorisë, ai zotëron dy godina biznesi në Tiranë, të cilat janë ngritur pas dënimit të tij në Itali për trafik ndërkombëtar droge.
Në njoftimin e organit të akuzës përmendet gjithashtu se një prej aksionerëve italianë të kompanisë “Medicamenta” është një shtetas i hetuar në Itali për korrupsion.
Prokuroria argumenton se analiza e dokumentacionit financiar dhe pasuror ka evidentuar një nivel pasurie që dyshohet se nuk justifikohet nga burimet e ligjshme të të ardhurave. Në këtë kuadër, hetimi synon të përcaktojë nëse asetet e regjistruara në emër të Shehut dhe personave apo subjekteve të lidhura me të janë përfituar si rezultat i aktivitetit kriminal.
Në njoftim referohen edhe dënime të mëparshme të tij në Itali për veprat penale të përfitimit të mallrave të vjedhura, pengmarrjes dhe shfrytëzimit të prostitucionit.
Cilat janë pasuritë që janë vënë nën sekuestro?
Sipas dokumentacionit të bërë publik nga Prokuroria, masa përfshin prona të regjistruara në emër të Ilir Shehut, pasuri të subjekteve tregtare dhe asete të personave të lidhur me të.
Në emër të vetë Shehut janë identifikuar tetë pasuri të paluajtshme, me numrat 211/1/59, 53/84, 211/1/46, 211/1/45, 211/1/42, 211/1/48, 211/1/72 dhe 211/1/91.
Ndërkohë, në emër të kompanisë “Mega Store” është përfshirë edhe një pasuri tjetër, me numër 211/1/49.
Përveç pronave, nën sekuestro janë vendosur edhe tetë automjete të lidhura me subjektin “Mega Store”. Bëhet fjalë për dy automjete Peugeot të vitit 2018, një Volkswagen Jetta të vitit 2015, një Mercedes-Benz GLE të vitit 2019, një Skoda Kodiaq të vitit 2019, një Volkswagen Caddy të vitit 2018, një Volkswagen ID.3 të vitit 2024 dhe një Land Rover Defender.
Masa e sekuestrimit përfshin gjithashtu subjektet “Medicamenta” sh.p.k., “Mega Store” sh.p.k., “Unipharma” sh.p.k. dhe “Italialbania Pharma” sh.p.k., si dhe subjekte të regjistruara si persona fizikë në emër të shtetasit I.Sh.
Sekuestrohen edhe gjashtë prona në Elbasan
Hetimi pasuror është shtrirë edhe te asetet e regjistruara në emër të një personi tjetër, të identifikuar në dokumentacionin e Prokurorisë me inicialet H.Sh.
Në këtë emër janë evidentuar gjashtë pasuri të paluajtshme në territorin e Elbasanit, me numrat 218, 221, 284, 175, 1001 dhe 100/8, të regjistruara në Zyrën Vendore të Regjistrimit të Pasurive të Paluajtshme.
Sekuestrimi i këtyre aseteve vjen në kuadër të hetimit për të përcaktuar origjinën e pasurisë dhe lidhjen e mundshme të saj me aktivitetin e dyshuar kriminal.
Hetimet vijojnë për të zbardhur të gjithë mekanizmin e dyshuar të kontrabandës së barnave, përfitimet financiare dhe mënyrën se si janë krijuar e regjistruar pasuritë që tashmë janë vendosur nën sekuestro.
Keni një histori? Denonco anonimisht, identiteti juaj mbrohet.
Denonco



