Gjykata e Tiranës me kërkesë të Prokurorisë ka sekuestruar pasuritë e shtetasit Ilir Shehu, alias Ilir Pasholli, si dhe të personave e subjekteve të lidhura me të. Hetimet nisën mbi dyshimet se pasuritë e tij janë përfituar në mënyrë të paligjshme nga përfshirja në trafikun e lëndëve narkotike. Nga verifikimet rezultoi se Ilir Shehu ishte zbuluar më herët nga autoritetet italiane si pjesë e një skeme kontrabande me ilaçe mes Italisë dhe Shqipërisë. Sipas hetuesve, barnat bliheshin në Itali me fatura zyrtare ku regjistroheshin mbi 10 artikuj të ndryshëm dhe kalonin doganën italiane me vlerë e peshë reale, por në doganën shqiptare dokumentacioni manipulohej duke deklaruar vetëm 4 ose 5 produkte. Pjesa tjetër e barnave futej kontrabandë në tregun shqiptar.