Rrjeti shumë i klasifikuar që përdor Agjencia e Sigurisë Kombëtare e SHBA-së (NSA) për komunikimet e brendshme ka pësuar një ndërprerje, duke shkaktuar probleme në shkëmbimin e informacioneve sekrete mes punonjësve të agjencisë. Incidenti është raportuar të martën dhe shton listën e defekteve teknologjike që kanë prekur së fundmi institucione dhe kompani të rëndësishme në SHBA.
Sistemi, i njohur si NSA Net, përdoret për komunikimin dhe transmetimin e informacioneve të klasifikuara brenda agjencisë. Sipas CNN, që citon gjashtë persona të njohur me çështjen, rrjeti ka dalë jashtë funksionit dhe specialistët po përpiqen të përcaktojnë përmasat e problemit.
Ndërprerja ka ndikuar edhe në organizimin e punës në selinë e NSA-së në Fort Meade, Maryland. Për të shmangur mbingarkesën e sistemit, janë vendosur orare të shkallëzuara për mbërritjen e personelit. Raportime të mëvonshme sugjerojnë se rrjeti mund të mos jetë plotësisht jashtë funksionit, por të ketë ndërprerje dhe probleme të herëpashershme në shërbim.
Deri më tani, burimet e cituara nga mediat amerikane nuk kanë identifikuar prova që incidenti të jetë shkaktuar nga një sulm kibernetik. Sipas një raportimi të “Wall Street Journal”, problemi mund të lidhet me një përditësim të softuerit të sistemit dhe të jetë i përkohshëm. Megjithatë, shkaku përfundimtar dhe shtrirja e plotë e ndërprerjes nuk janë bërë ende publike.
NSA nuk ka dhënë një koment zyrtar për ngjarjen. Ndërkohë, sipas raportimeve, defekti nuk pritet të pengojë transmetimin e informacioneve urgjente të inteligjencës te presidenti amerikan Donald Trump, i cili ndodhet në një udhëtim në Azi. Qeveria amerikane disponon sisteme rezervë dhe kanale alternative për komunikime të sigurta.
Incidenti në rrjetin e NSA-së vjen pas disa problemeve të tjera teknologjike të raportuara gjatë ditëve të fundit në SHBA. Javën e kaluar, një defekt preku shërbimet e Microsoft, përfshirë Outlook dhe Teams, duke shkaktuar ndërprerje të gjera.
Po ashtu, një problem në sistemet e komunikimit të kontrollit ajror çoi në ndalimin për disa orë të fluturimeve në të gjithë vendin. Vështirësi janë raportuar edhe në shërbimet bankare, përfshirë JPMorgan Chase, si dhe në sistemet e kompanisë ajrore United Airlines.
Deri tani nuk ka konfirmime se këto incidente kanë lidhje me njëri-tjetrin apo se janë pasojë e sulmeve kibernetike. Megjithatë, përsëritja e defekteve në sisteme që mbështesin shërbime kritike ka rikthyer vëmendjen te cenueshmëria e infrastrukturës teknologjike amerikane.


