Presidentja e Kosovës, Justina Shiroka-Pula, ka ngritur shqetësime për respektimin e të drejtave të palëve pas aktgjykimit të Dhomave të Specializuara në Hagë ndaj ish-presidentit Hashim Thaçi dhe të akuzuarve të tjerë për pengim të administrimit të drejtësisë.

Presidentja e Kosovës, Justina Shiroka-Pula, kërkon që çdo procedurë gjyqësore të jetë në përputhje me Kushtetutën e Kosovës dhe standardet ndërkombëtare për një gjykim të drejtë.

Shiroka-Pula thekson se çdo institucion i Republikës së Kosovës, përfshirë edhe Dhomat e Specializuara, duhet të veprojë brenda juridiksionit të përcaktuar nga Kushtetuta dhe të garantojë të drejtat dhe liritë themelore të njeriut.

“Çdo proces gjyqësor duhet të zhvillohet në përputhje të plotë me standardet ndërkombëtare të gjykimit të drejtë, duke garantuar të drejtat e të akuzuarve dhe respektimin e procedurave ligjore”, thuhet në reagimin e presidentes.

Ajo vlerëson se aktgjykimi i sotëm ngre shqetësime lidhur me respektimin e të drejtave të palëve në këtë proces.

Në reagim rikujtohet gjithashtu se të drejtat e qytetarëve garantohen nga Kapitulli II i Kushtetutës së Kosovës, ndërsa standardet ndërkombëtare për të drejtat e njeriut janë pjesë e rendit kushtetues përmes Nenit 22.

Presidentja thekson se Kosova mbetet e përkushtuar ndaj drejtësisë, sundimit të ligjit dhe mbrojtjes së të drejtave dhe lirive themelore të njeriut.

Në përfundim, ajo shpreh pritshmërinë që Dhomat e Specializuara të veprojnë në të njëjtën frymë, duke garantuar respektimin e standardeve ndërkombëtare gjatë gjithë procesit gjyqësor, përfshirë edhe të drejtën e ankimit.

 

Top Channel