Nvidia ndalon dërgimin në Kinë të çipeve të inteligjencës artificiale të miratuara nga SHBA-ja
Nvidia ka ndaluar dërgimin e çipave të fuqishëm për inteligjencën artificiale në Kinë, deklaroi drejtoresha ekzekutive e përkohshme e kompanisë, duke ngritur dyshime mbi të ardhmen e një marrëveshjeje të veçantë licencimi, të negociuar mes Uashingtonit dhe Pekinit.
Colette Kress, e cila zëvendësoi Jensen Huang-un pas dorëheqjes së tij javën e kaluar, tha gjatë një takimi të martën për prezantimin e rezultateve financiare se, në tremujorin e mbyllur më 25 tetor, prodhuesi amerikan i çipave i shiti Kinës produkte për qendra të dhënash të gjeneratës "Hopper" – të cilat i nënshtrohen një sistemi licencimi – në vlerë prej 2,4 miliardë dollarësh.
Megjithatë, ajo theksoi se aktualisht nuk ka plane për dërgesa të mëtejshme.
"Parashikimet tona nuk përfshijnë asnjë produkt të licencuar të gjeneratës 'Hopper' për qendra të dhënash, dhe ne nuk po dërgojmë më produkte të tilla në Kinë", u shpreh Kress, shkruajnë mediat e huaja, përcjell Telegrafi.
Ajo nuk dha shpjegime se përse Nvidia e ka ndaluar dërgimin e këtyre procesorëve, e as nëse ky ndalim do të jetë i përhershëm.
Familja e produkteve "Hopper" përfshin H200, një procesor i fuqishëm që përdoret për trajnimin dhe ekzekutimin e modeleve të avancuara të inteligjencës artificiale.
SHBA-ja vendosi kontrolle mbi eksportin e këtyre çipave në vitin 2022 dhe më pas e kufizoi edhe më tej qasjen e Kinës ndaj tyre.
Megjithatë, pas një takimi me presidentin kinez Xi Jinping vitin e kaluar, presidenti amerikan Donald Trump deklaroi se do të lejonte shitjen e modeleve H200 për klientë kinezë të miratuar.
Në janar, SHBA-ja e lehtësoi politikën e licencimit për H200, duke mundësuar shqyrtimin individual të kërkesave për eksport, në varësi të kushteve të sigurisë.
Ky vendim erdhi pas muajsh të tërë lobimi nga ana e Huang-ut, i cili u largua nga detyra ndërsa përballej me akuza për lidhje jashtëmartesore me një person që dyshohet se ishte spiune kineze, si dhe me dy punonjëse të Nvidia-s.
Çipat H200 prodhohen për Nvidia-n në Tajvan nga TSMC – prodhuesi më i madh në botë i çipave me kontratë. /Telegrafi/





























