Trump, Putin dhe Xi bashkë në Kinë, shtrëngojnë duart në samitin e APEC-ut, nesër pritet takimi historik...

Trump, Putin dhe Xi bashkë në Kinë, shtrëngojnë duart në samitin e APEC-ut, nesër pritet takimi historik...

21:10, 18/11/2026
ZMADHO TEKSTIN
+ Aa -

 

Presidenti amerikan Donald Trump, ai rus Vladimir Putin dhe presidenti kinez Xi Jinping janë shfaqur së bashku këtë të mërkurë në Shenzhen të Kinës, në kuadër të samitit të Bashkëpunimit Ekonomik Azi-Paqësor (APEC). Tre liderët shtrënguan duart dhe morën pjesë në fotografinë zyrtare përpara darkës së mirëseardhjes, ndërsa vëmendja ndërkombëtare është përqendruar te takimi i tyre trepalësh, i parashikuar për të enjten.

Sipas Euronews, Trump dhe Putin shkëmbyen përshëndetje dhe shtrënguan duart në praninë e Xi Jinping, në takimin e tyre të parë ballë për ballë që nga gushti i vitit 2025. Presidenti amerikan u prit më herët në aeroport nga vetë lideri kinez, i cili e përshëndeti me një përqafim, në një gjest të veçantë diplomatik.

Ndërkohë, përpara mbërritjes së Trumpit, Xi Jinping zhvilloi bisedime dypalëshe me Vladimir Putinin. Sipas Euronews, ky ishte takimi i tyre i pestë gjatë këtij viti. Në bisedime u diskutuan marrëdhëniet mes dy vendeve dhe zhvillimet ndërkombëtare, përfshirë luftën në Ukrainë.

Takimi i së enjtes mes tre liderëve pritet të përqendrohet te lufta në Ukrainë, konflikti në Iran, tregtia ndërkombëtare, inteligjenca artificiale dhe çështjet bërthamore. Sipas Associated Press (AP), Trump do të zhvillojë gjithashtu një takim të veçantë me Putinin, përveç bisedimeve trepalëshe me Xi Jinping.

Agjencia Reuters raporton se takimi trepalësh pritet të zgjasë rreth një orë. Zëdhënësi i Kremlinit, Dmitry Peskov, ka konfirmuar se është parashikuar ky afat kohor, ndërsa pala ruse ka sqaruar se takimi dypalësh Trump-Putin nuk do të përbëjë negociata të plota mes dy delegacioneve.

Në prag të këtyre bisedimeve, Xi Jinping dhe Putin kanë kritikuar politikat ekonomike të Perëndimit. Në fjalimin e tij në samitin APEC, presidenti kinez bëri thirrje për tregti dhe investime të lira e të hapura, duke kundërshtuar proteksionizmin dhe masat e njëanshme.

Nga ana tjetër, Putin sulmoi sanksionet perëndimore të vendosura ndaj Rusisë për shkak të luftës në Ukrainë, duke i cilësuar ato si instrumente që nuk mund të ndalin zhvillimin ekonomik të vendeve të tjera. Ai i përshkroi fuqitë perëndimore si “hegjemonë të dikurshëm” dhe deklaroi se pret përfitime të mëdha nga takimi i ardhshëm trepalësh.

Takimi në Shenzhen ka ngjallur shqetësim në disa kryeqytete europiane dhe aziatike. Sipas Euronews, ekziston frika se tri fuqitë mund të diskutojnë të ardhmen e Ukrainës dhe çështje të tjera të sigurisë ndërkombëtare pa përfshirjen e drejtpërdrejtë të vendeve që preken nga këto vendime.

Samiti është krahasuar me Konferencën e Jaltës të vitit 1945, ku SHBA-ja, Britania e Madhe dhe Bashkimi Sovjetik përcaktuan një pjesë të rendit botëror pas Luftës së Dytë Botërore.

Takimi i së enjtes pritet të jetë një nga zhvillimet më të rëndësishme diplomatike të këtij viti, ndërsa rezultatet e tij do të ndiqen me vëmendje nga vendet e përfshira në konfliktet dhe tensionet aktuale ndërkombëtare.

© SYRI.net

Lexo edhe:

Denonco