Edi Rama i opozitës dhe Edi Rama pas 12 vitesh në pushtet duket se kanë qëndrime krejt të kundërta për ndëshkimin e protestuesve me gjoba.
Sot, Policia e Shtetit po gjobit qytetarët që qëndrojnë para Kryeministrisë, edhe kur nuk zhvillojnë një protestë tradicionale, por thjesht qëndrojnë në këmbë me duart në xhepa. Autoritetet i konsiderojnë këto tubime të paligjshme, duke u mbështetur në Aktin Normativ të miratuar së fundmi me urgjencë nga qeveria Rama.
Por qëndrimi i kryeministrit sot bie ndesh me atë që deklaronte kur ishte në opozitë. Në një intervistë për emisionin “Opinion”, Rama e cilësonte vendosjen e gjobave ndaj protestuesve si një akt poshtërues dhe një përpjekje të qeverisë për të frikësuar qytetarët e për t’i larguar ata nga protestat.
“Këta janë turrur vënë gjoba për të trembur njerëzit, o Fevzi. Ato gjobat mbajini se janë medalje të betejës tuaj qytetare me këtë pushtet maskara. Kjo është një nga poshtërsitë më të mëdha që mund të bëhen në këtë vend”, deklaronte Rama asokohe.
Ndërsa sot, më 25 tetor 2026, kryeministri prezantoi një paketë të re masash për protestat, ku parashikohen gjoba deri në 500 mijë lekë për pjesëmarrësit në tubime.
Ajo që dikur Rama e quante “poshtërsi” dhe një mekanizëm për të trembur qytetarët, sot është kthyer në një masë që zbatohet nga qeveria e tij. Gjoba që dikur i cilësonte si “medalje të betejës qytetare”, sot po u vendosen protestuesve përballë Kryeministrisë.













