Mazhoranca socialiste ka miratuar në Kuvend me forcën e kartonit Buxhetin e vitit 2027, i cili kap vlerën e mbi 10 miliardë eurove.
Pas rreth 14 orësh debatesh dhe përplasjesh mes mazhorancës dhe opozitës, projektbuxheti mori 80 vota pro dhe 25 kundër, ndërsa asnjë deputet nuk votoi abstenim.

Projektbuxheti është shoqëruar me debate të forta politike gjatë seancës plenare. Socialistët e kanë paraqitur si një instrument zhvillimi dhe investimesh, ndërsa opozita e cilëson si një buxhet që nuk i përgjigjet nevojave reale të qytetarëve.
Një nga kritikat kryesore lidhet me faktin se, pavarësisht shifrave rekord, barra financiare për qytetarët dhe bizneset rrezikon të rritet. Sipas opozitës, ndryshimet në paketën fiskale sjellin detyrime të reja për sipërmarrjen, ndërsa koston përfundimtare mund ta paguajnë konsumatorët përmes rritjes së çmimeve të shërbimeve dhe produkteve.
Kritika të forta janë ngritur edhe për mungesën e mbështetjes së mjaftueshme për shtresat në nevojë. Deputetë të opozitës kanë kërkuar vendosjen e minimumit jetik prej 250 eurosh, duke argumentuar se pensionistët, familjet në ndihmë ekonomike, personat me aftësi të kufizuara dhe kategoritë më të pamundura vijojnë të përballen me vështirësi të mëdha ekonomike.
Edhe ndryshimet fiskale kanë qenë në qendër të debatit. Paketa parashikon rritjen e tatimit mbi dividendin nga 8% në 15%, si dhe uljen e pragut të regjistrimit në TVSH nga 10 milionë në 5 milionë lekë. Sipas kundërshtarëve të qeverisë, këto masa mund të shtojnë kostot për bizneset e vogla dhe profesionistët e lirë, duke ndikuar drejtpërdrejt edhe te qytetarët.
Një tjetër kritikë lidhet me orientimin e fondeve publike drejt projekteve, tenderëve dhe koncesioneve, për të cilat kërkohet më shumë transparencë dhe kontroll. Sipas saj, përfituesit kryesorë të politikave ekonomike të qeverisë nuk janë domosdoshmërisht qytetarët dhe shtresat e pambrojtura, por grupe të mëdha ekonomike dhe interesa të lidhura me pushtetin.
Por pavarësisht kundërshtimeve, Buxheti është miratuar me 80 vota pro në seancën maratonë, në orët e para të mëngjesit të sotëm. Pas miratimit në parim në seancën plenare, projektbuxheti do të rikthehet për shqyrtim në komisionet parlamentare, ku do të diskutohet nen për nen.














