“Ndihem budalla”, Elon Musk pendohet që shpenzoi gati 500 milionë dollarë për republikanët

Elon Musk ka shprehur pendesë për afro 500 milionë dollarët që shpenzoi për të mbështetur kandidatët republikanë në zgjedhjet afatmesme në SHBA, duke pranuar se investimi i tij i madh financiar nuk solli rezultatet e pritshme. Gjatë një interviste në aktivitetin DealBook të The New York Times, të mbajtur më 18 nëntor në Nju Jork, miliarderi deklaroi se ndihej “shumë budalla” që kishte shpenzuar kaq shumë para për kaq pak përfitim politik.
Kreu i Tesla-s dhe SpaceX shpjegoi se synimi i tij ishte që republikanët të ruanin kontrollin e Dhomës së Përfaqësuesve dhe Senatit, ndërsa Donald Trump të vazhdonte të qëndronte në Shtëpinë e Bardhë. Megjithatë, rezultati zgjedhor e bëri të rishikonte bindjen se paratë mund të përcaktojnë suksesin politik. “Zgjedhjet nuk janë vetëm çështje parash”, u shpreh Musk, duke pranuar se, nëse do të mund të kthehej pas në kohë, do të shpenzonte shumë më pak.
Një nga shembujt më të dukshëm të dështimit të kësaj strategjie ishte gara për një vend në Senatin amerikan në Teksas. Musk mbështeti fuqishëm kandidatin republikan Ken Paxton, me një financim që lidhet me mbi 220 milionë dollarë, por ai u mund nga demokrati 37-vjeçar James Talarico. Humbja ishte veçanërisht domethënëse për Musk, pasi Teksasi është një nga qendrat kryesore të aktiviteteve të tij ekonomike, ku ndodhen objekte dhe seli të rëndësishme të kompanive të tij.
Gjatë intervistës, Musk komentoi edhe fitoren e demokrates Gina Hinojosa në garën për guvernatore të Teksasit, e cila pritet të marrë detyrën në janar 2027, duke pasuar republikanin Greg Abbott. Pavarësisht dallimeve politike, ai nuk shprehu shqetësim për ndikimin që ndryshimi i drejtimit politik mund të ketë mbi bizneset e tij në këtë shtet.
“Besoj se ajo do të jetë mjaft e moderuar. Nuk mendoj se do të jetë një guvernatore e së majtës ekstreme”, deklaroi Musk, duke shtuar se, bazuar në informacionet që ka për të, pret që gjërat të shkojnë mirë në Teksas nën drejtimin e saj.




