Një 44-vjeçar është arrestuar nga Policia e Korçës, pasi ka hyrë dhunshëm në një klinikë dentare, duke kërcënuar me thikë stomatologen, me qëllim vjedhjen e klinikës.
Ngjarja është regjistruar mbrëmjen e djeshme në lagjen nr. 5 të qytetit të Korçës, ku Artur Çina, i dënuar më parë për vjedhje me dhunë, ka hyrë në klinikën dentare, duke mbajtur në dorë një mjet prerës.
Mësohet se ky i fundit ka sulmuar stomatologen, duke i grisur përparësen, e ka shtyrë me forcë dhe e ka kërcënuar duke i drejtuar thikën.
Ai ka mundur të marrë vetëm laptopin, duke u larguar me shpejtësi nga klinika.
Forcat e Komisariatit të Policisë Korçë, menjëherë pas marrjes së njoftimit, kanë shkuar në vendngjarje, ku kanë bërë të mundur kapjen dhe arrestimin në flagrancë të 44-vjeçarit.
Thika e dyshuar e përdorur për kanosjen dhe laptopi i vjedhur janë sekuestruar në cilësinë e provës materiale.
Materialet janë referuar pranë Prokurorisë së Korçës, ku do të vijojnë edhe veprimet e mëtejshme, për veprat penale "Vjedhja me dhunë" dhe "Prodhimi, mbajtja, blerja apo shitja pa leje e armëve të ftohta".
Njoftimi i Ploicisë:
Korçë/Kanosi me mjet prerës (thikë) dhe shtyu me forcë, pronaren e klinikës dentare ku hyri për të vjedhur, arrestohet në flagrancë 44-vjeçari, me precedent penal për vjedhje me dhunë.
Sekuestrohen thika e dyshuar e përdorur për kanosjen dhe një laptop i vjedhur në klinikë.
Specialistët për Hetimin e Krimeve të Komisariatit të Policisë Korçë, menjëherë pas njoftimit se një shtetas kishte hyrë në një klinikë private, në lagjen nr. 5, dhe po kanoste me thikë pronaren e kësaj klinike, me qëllim vjedhjen, kanë organizuar punën dhe kanë shkuar menjëherë në vendngjarje, ku kanë bërë të mundur kapjen në flagrancë dhe arrestimin e shtetasit:
-A. Ç., 44 vjeç, banues në Korçë, i dënuar më parë për vjedhje me dhunë.
Ky shtetas ka hyrë në ambientet e një klinike dentare, ku pasi ka shtyrë me forcë pronaren e klinikës dhe e ka kanosur atë, me mjet prerës (thikë), ka vjedhur një laptop.
Thika e përdorur për kanosjen dhe laptopi u sekuestruan në cilësinë e provës materiale.
Materialet procedurale iu referuan Prokurorisë pranë Gjykatës së Juridiksionit të Përgjithshëm Korçë, për veprime të mëtejshme, për veprat penale “Vjedhja me dhunë” dhe “Prodhimi, mbajtja, blerja apo shitja pa leje e armëve të ftohta”.
© SYRI.net