Sipas njoftimit të Prokurorisë, e pandehura dyshohet se më 13 nëntor 2024, në Gjykatën Themelore në Ferizaj, Divizioni Civil, ka paraqitur autorizim të falsifikuar, kinse të lëshuar nga xhaxhai i saj, për shitjen e pronave të tij në Kosovë.

Prokuroria thotë se ky autorizim pretendohej të ishte bazuar në një kontratë të vitit 2012, të lidhur pranë një noteri në Maqedoninë e Veriut. Përmes dokumenteve të falsifikuara, gjykata kishte nxjerrë aktgjykim me të cilin personit L.H. i ishte njohur e drejta e pronësisë mbi disa parcela në zonën kadastrale Petroviq të Komunës së Shtimes.

Po ashtu, sipas aktakuzës, më 20 tetor 2016, në Ferizaj, e pandehura dyshohet se kishte mashtruar personin M.K., duke pretenduar se kishte autorizim nga xhaxhai për shitjen e pronave. I dëmtuari kishte kryer pagesa në llogarinë bankare të saj, në shuma të ndryshme, por më vonë kishte kuptuar se autorizimi ishte i falsifikuar.

Në këtë rast, Prokuroria vlerëson se të pandehurës i atribuohet shkaktimi i dëmit pasuror prej 200 mijë eurosh.

Ndërkaq, gjatë vitit 2018, e pandehura dyshohet se kishte mashtruar edhe personin L.H., duke përdorur të njëjtin autorizim të falsifikuar për shitjen e pronës së xhaxhait të saj.

Sipas Prokurorisë, palët kishin lidhur një parakontratë për shitblerjen e pronës në vlerë prej 170 mijë eurosh, me marrëveshjen që 120 mijë euro të paguheshin deri në vitin 2020, ndërsa 50 mijë eurot e mbetura pas pajisjes me fletë poseduese. Prokuroria thotë se përmes këtyre veprimeve, të pandehurës i atribuohet shkaktimi i dëmit prej 120 mijë eurosh.

Prokurori i rastit i ka propozuar gjykatës që, pas mbajtjes së shqyrtimit gjyqësor dhe administrimit të provave, të pandehurën ta shpallë fajtore dhe ta dënojë sipas ligjit për veprat penale për të cilat akuzohet.