Për gjashtë muaj në krye të Kombëtares shqiptare, Rolando Maran e ngjiti skuadrën nga Liga C në Ligën B duke bërë një nga edicionet më të mira të këtij kompeticioni.
Trajneri i kuqezinjve ka treguar për “Gazzetta Dello Sport” aventurën në Shqipëri dhe objektivat e së ardhmes.
“Bilanci është pozitiv në këta 6 muaj të parë. U ngjitëm në Ligën B dhe jam shumë i lumtur. Kemi rikthyer euforinë në skuadër. Tifozët janë të çmendur pas Kombëtares. Kur luajmë në Tiranë nuk ka vende në stadium. Jam përpjekur të ndryshoj mentalitetin dhe bashkë me lojtarët ia dolëm”, tha Maran.
A do ta donte Maran një përballje me Italinë në fazën kualifikuese të Europianit?
“Sinqerisht nuk di të përgjigjem. Do të ishte një emocion i madh për mua, por do të ishte e çuditshme. Por pavarësisht rivalëve që do të kemi përballë, ne duhet të luftojmë për të siguruar kualifikimin. Kemi një ekip me teknikë dhe besim që mund të shkojmë në Europian”, tha Maran.
Italiani nuk i ka kursyer elozhet për Ernest Muçin, Manajn dhe Hysajn.
“Muçi ka disa goditje magjike. Po rrëmben disa sekrete nga Salah këtë vit, por teknika e tij është e jashtëzakonshme. Manaj po shënon vazhdimisht dhe më detyron të lë edhe Shpendin në stol. Do ta ketë shansin e tij. Për Hysajn nuk di çfarë të them. Ka disa muaj pa skuadër, por nga të dhënat duket në formë të shkëlqyer”, tha Maran.
Një koment e ka edhe për shanset që Elia Kaprile të luajë me Kombëtaren shqiptare.
“Elia ka marrë pasaportë për arsye familjare. Nuk kemi folur ende për mundësinë që të luajë për Shqipërinë, por nëse ai do të ishte i gatshëm do të na bënte komodë. Të shohim çfarë do të ndodhë”, tha Maran.
Rolando Maran e ka drejtuar Kombëtaren kuqezi në 8 ndeshje duke marrë 5 fitore dhe 3 humbje.










