Bordi i Transparencës ka vendosur çmimet e reja tavan për karburantet, duke ulur çmimin e shitjes me pakicë të naftës dhe benzinës, ndërsa gazi për automjete do të tregtohet me 71 lekë/litër.
Sipas vendimit të marrë më 19 nëntor 2026, çmimi i naftës nuk do të kalojë 201 lekë/litër në pikat e shitjes me pakicë, ndërsa për tregtimin me shumicë është përcaktuar një çmim maksimal prej 189 lekësh/litër.
Edhe benzina do të tregtohet me çmime më të ulëta. Çmimi maksimal me pakicë është caktuar në 160 lekë/litër, ndërsa ai me shumicë në 148 lekë/litër.
Për gazin e përdorur nga automjetet, çmimi maksimal i shitjes me pakicë do të jetë 71 lekë/litër dhe ai me shumicë 59 lekë/litër.
Ndërkohë, çmimi i naftës për aktivitetin e peshkimit është përcaktuar në 105 lekë/litër.
Çmimet e reja hyjnë në fuqi sot, më 19 nëntor, në orën 14:00 dhe do të mbeten të vlefshme deri në mbledhjen e ardhshme të Bordit të Transparencës, kur do të rishikohen në varësi të ndryshimeve në treg.
Bordi u ka rikujtuar operatorëve të tregtimit me shumicë dhe pakicë detyrimin për të zbatuar çmimet e përcaktuara, duke paralajmëruar se shkeljet e konstatuara do të shoqërohen me masa, përfshirë pezullimin e aktivitetit.
Vendimi është marrë në kuadër të situatës së veçantë të shpallur në tregun e hidrokarbureve, në mbështetje të Vendimit të Këshillit të Ministrave nr. 711, datë 16 shtator 2026, si dhe të legjislacionit për tregtimin e naftës, gazit dhe nënprodukteve të tyre.
Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë deklarojnë se janë angazhuar për mbrojtjen e interesave të konsumatorëve dhe garantimin e konkurrencës së ndershme në tregun e hidrokarbureve.


