
“Grand Theft Auto VI” pritet të bëhet lançimi më i madh në historinë e industrisë së argëtimit, ndërsa seria e videolojërave rikthehet të enjten pas një ndërprerjeje prej 13 vitesh. Ky lançim përbën një provë vendimtare për industrinë e videolojërave, e cila po përballet me kosto rekord të çipeve të memories.
Sipas vlerësimeve të përpiluara nga S&P Global Visible Alpha, analistët presin që loja të gjenerojë 2 miliardë dollarë të ardhura vetëm nga shitja e kopjeve gjatë gjashtë javëve të ardhshme.
GTA VI, hedhja në treg e së cilës është shtyrë disa herë gjatë viteve të fundit, është një aventurë kriminale në stilin e Bonnie dhe Clyde, që ndjek çiftin e kriminelëve Jason dhe Lucia. Kjo e fundit është protagonistja e parë femër në historinë e serisë, e prezantuar pas akuzave për mizogjini. Së bashku, ata shkaktojnë kaos në një metropol të frymëzuar nga Miami.
“E gjithë bota do të flasë për të… Ajo e lë në hije çdo film”, tha Ian Livingstone, veteran i industrisë dhe ish-kryetar ekzekutiv i Eidos Interactive, kompania që publikoi serinë Tomb Raider. Ai shtoi se loja do të jetë gjithashtu “më e madhe, më e mirë dhe më e bukur” se paraardhësja e saj, e cila theu rekorde.
Vlerësimet e para të lojës tregojnë se lojtarët do të kenë stimuj për të zhvilluar marrëdhënien mes dy protagonistëve, si dhe më shumë mundësi për të shmangur kaosin dhe dhunën e lojërave të mëparshme. Loja u ngjit shpejt në vendin e parë për vlerësimet në platformat përmbledhëse Metacritic dhe OpenCritic, me një rezultat prej 99 pikësh nga 100.

‘GTA VI’ u ngjit me shpejtësi në krye të renditjes në platformat e grumbullimit të vlerësimeve, Metacritic dhe OpenCritic
Sipas vlerësimeve të Sensor Tower, porositë paraprake për lojën kanë tejkaluar tashmë 1.5 miliardë dollarë, duke lënë shumë pas GTA V, e cila në vitin 2013 arriti 1 miliard dollarë shitje brenda vetëm tri ditësh. Më pas, GTA V shiti gati 235 milionë kopje në mbarë botën, pothuajse gjysmën e shitjeve totale të të gjithë serisë, shkruan Ft.
Për krahasim, filmi me të ardhurat më të larta gjatë pesë viteve të fundit, “Spider-Man: Brand New Day”, ka gjeneruar 2.5 miliardë dollarë në mbarë botën që nga publikimi i tij në korrik, sipas Rentrak. Çmimi i GTA VI, që nis nga 79.99 dollarë, është ndjeshëm më i lartë se ai i një bilete kinemaje.
Strauss Zelnick, drejtori ekzekutiv i Take-Two Interactive, kompania që zotëron zhvilluesin e GTA-së, Rockstar Games, u tha investitorëve gjatë konferencës për rezultatet tremujore të kompanisë javën e kaluar se loja do të ishte “përvoja më e madhe, më e detajuar dhe më novatore që Rockstar Games ka krijuar ndonjëherë”. Ai shtoi se niveli i porosive paraprake ishte “shumë përtej pritshmërive tona fillestare”.
Në një tjetër tregues të ndikimit kulturor të kësaj serie përtej industrisë së videolojërave, Rockstar publikoi në gusht një trailer 27-minutësh për lançimin në Netflix. Ai kryesoi listat e shikueshmërisë së platformës, me më shumë se 30 milionë shikime brenda katër ditësh.
Piers Harding-Rolls, drejtues i kërkimeve për industrinë e videolojërave në Ampere Analysis, e përshkroi lançimin e fundit si një moment historik për sektorin, duke thënë se shkalla e këtij prodhimi “nuk ka gjasa të arrihet më kurrë”.

Porositë paraprake për lojën tashmë kanë kaluar shifrën prej 1,5 miliardë dollarësh
“GTA VI ka pasur një cikël zhvillimi prej më shumë se 10 vitesh, mijëra punonjës që kanë punuar në të gjithë lojën dhe, me sa duket, një buxhet pa kufizime”, shtoi ai.
Industria më e gjerë e videolojërave po përballet me kërcënimin e ndryshimeve që mund të sjellë inteligjenca artificiale, si dhe me ndikimin e rritjes së menjëhershme të çmimeve të çipeve të memories te prodhuesit e konsolave, si Sony dhe Nintendo.
“Nëse loja nuk i përmbush pritshmëritë e mëdha, ose edhe më keq, industria do të gjendet vërtet në një territor të panjohur”, tha Gareth Sutcliffe, analist në Enders Analysis. “Për platformat aktuale të konsolave, kjo do të ngjante me një ngjarje që mund të shënonte zhdukjen e tyre”.
Për Sony-n, e cila ka pothuajse monopolin mbi mundësinë e publikimit të lojës, GTA VI mund të jetë një nga mundësitë e fundit për të rritur shitjet e konsolës së saj kryesore, PlayStation 5, të lançuar në vitin 2020.
“Sony është shumë e kufizuar nga mungesa e memories. Përpara rritjes së çmimeve të memories, mendonim se Sony mund të shiste 16 deri në 17 milionë PlayStation këtë vit, e ndihmuar nga GTA VI. Tani synimi është 10 milionë, ndoshta pak më shumë”, tha Robin Zhu, analist në Bernstein.
“Kufizimet në furnizimin me memorie dhe kostoja e saj nënkuptojnë se Sony nuk ka gjasa të jetë në gjendje të rrisë prodhimin aq sa të përfitojë plotësisht nga kërkesa që do të gjenerojë GTA VI”, shtoi Zhu.