Kryeministri Edi Rama do të mbledhë të shtunën, më 21 nëntor, Asamblenë e Partisë Socialiste për Tiranën, ku në qendër të diskutimeve do të jenë përgatitjet për zgjedhjet lokale të 9 majit, me fokus të veçantë garën për kryeqytetin.
Mbledhja është planifikuar të zhvillohet në orën 11:00, në ambientet e “Xibrakut”, një javë pas takimit që Rama zhvilloi me Asamblenë e PS-së në Gjirin e Lalëzit.
Takimi i kaluar u përqendrua te organizimi për zgjedhjet, por u shoqërua edhe me debate dhe përplasje brenda Partisë Socialiste. Gjatë mbledhjes, Rama kërkoi përjashtimin e deputetes Elisa Spiropali dhe avokatit Plarent Ndreca nga forumet drejtuese të partisë.
Kërkesa për përjashtimin e tyre nga PS-ja nuk u hodh në votim. Pas takimit, sekretari i Përgjithshëm i socialistëve, Blendi Klosi, sqaroi se Spiropali dhe Ndreca nuk do të jenë më pjesë e forumeve drejtuese, por do të vijojnë të jenë anëtarë të partisë.
Gjatë diskutimeve në Lalëz pati edhe kundërshtime nga disa figura të Partisë Socialiste, mes tyre Fatmir Xhafaj, Pandeli Majko dhe Erion Braçe.
Mbledhja e së shtunës pritet të rikthejë vëmendjen te organizimi elektoral i socialistëve në Tiranë, ndërsa mbetet për t’u parë nëse diskutimet do të shoqërohen edhe me zhvillime të tjera në strukturat e partisë.


