Operacioni “Risia” në Tiranë, sekuestrohen mbi 12 kg kanabis në trajtë xhelatinoze dhe kokainë, një i arrestuar dhe një në kërkim

Aktualitet | 1 minutë më parë

Specialistët e Seksionit për Hetimin e Narkotikëve në Tiranë kanë finalizuar operacionin policor të koduar “Risia”, duke goditur një rast të transportimit dhe shpërndarjes së lëndëve narkotike. Gjatë ndërhyrjes u sekuestruan 12.1 kilogramë kanabis në trajtë xhelatinoze, një sasi kokaine, dy automjete dhe tre aparate celulare.

Sipas njoftimit zyrtar të policisë, operacioni u zhvillua në orët e para të mëngjesit të sotëm, më 19 nëntor 2026, në autostradën “Tiranë–Elbasan”, pas administrimit të të dhënave operative. Shërbimet e policisë i bënë shenjë ndalimi automjetit që drejtohej nga shtetasi F. I., 22 vjeç, banues në Paskuqan, i cili dyshohet se po transportonte lëndën narkotike të përgatitur për t’u shitur në tregun vendas.

I riu nuk iu bind urdhrit të efektivëve, duke vijuar lëvizjen me shpejtësi, për ta braktisur më pas mjetin në autostradë dhe për t’u larguar nga vendngjarja. Gjatë kontrollit të ushtruar në automjetin e braktisur, policia gjeti dhe sekuestroi 12.1 kilogramë lëndë të dyshuar narkotike Cannabis Sativa në trajtë xhelatinoze.

Paralelisht me ndjekjen e mjetit kryesor, efektivët konstatuan se lëvizjet e tij monitoroheshin dhe siguroheshin nga një automjet i dytë, i drejtuar nga shtetasi M. V., 22 vjeç, gjithashtu banues në Paskuqan. Ai u ndalua dhe u arrestua në flagrancë, ndërsa gjatë kontrollit të ushtruar në banesën e tij u gjet edhe një sasi lënde e dyshuar narkotike kokainë.

Aktualisht, shtetasi F. I. është shpallur në kërkim dhe vijon puna për kapjen e tij. Në drejtimin e Prokurorisë, po vijojnë hetimet për të identifikuar dhe vënë para përgjegjësisë penale persona të tjerë të mundshëm të implikuar në këtë veprimtari kriminale, ndërsa materialet procedurale i kanë kaluar organit të akuzës për veprime të mëtejshme.

/rtsh.al/

 


Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.

Komentet 0

Ende nuk ka komente. Bëhuni i pari që komenton.

Të ngjashme