Trump telefonon nga avioni liderët në samitin e Berlinit, i kritikon për planin për 70 miliardë euro ndihmë për Ukrainën
Presidenti amerikan Donald Trump ka telefonuar nga avioni presidencial Air Force One liderët e mbledhur në samitin e Koalicionit të të Vullnetshmëve në Berlin, ku ka shprehur optimizëm për mundësinë e arritjes së një marrëveshjeje paqeje mes Rusisë dhe Ukrainës. Gjatë bisedës, Trump ka vënë në pikëpyetje edhe planin për dhënien e 70 miliardë eurove ndihmë të re financiare për Kievin.
Sipas raportimeve të mediave, telefonata u zhvillua të enjten pasdite, disa orë pas takimit trepalësh të Trump me presidentin rus Vladimir Putin dhe atë kinez Xi Jinping në Shenzhen të Kinës.
Tre persona në dijeni të bisedës kanë bërë të ditur se presidenti amerikan shprehu rezerva për nevojën e dhënies së miliarda eurove të tjera për Ukrainën. Dy pjesëmarrës në samit i përshkruan komentet e tij si një shpërthim zemërimi, gjatë të cilit ai kritikoi planet e Bashkimit Evropian dhe mbështetësve të tjerë ndërkombëtarë të Kievit për të ofruar 70 miliardë euro ndihmë.
Një tjetër pjesëmarrës dha një version më të moderuar të bisedës, duke thënë se Trump kishte vënë në dukje se sa para mund të kursenin vendet nëse lufta do të përfundonte dhe nuk do të ishte më e nevojshme të financonin Ukrainën.
Trump: Putin dëshiron paqe
Sipas personave të pranishëm në bisedë, Trump u shpreh optimist për mundësinë e përfundimit të luftës përmes negociatave. Ai u tha liderëve se besonte që presidenti rus Vladimir Putin dëshironte paqen.
Presidenti amerikan argumentoi se përpjekjet ndërkombëtare duhet të përqendrohen te arritja e një marrëveshjeje paqeje, në vend që të vazhdohet me dërgimin e ndihmave të tjera financiare për Ukrainën.
Trump mori pjesë në bisedë duke telefonuar Jared Kushner, i cili ishte i pranishëm në samitin e zhvilluar në Kancelarinë Gjermane.
Takimi në Berlin u organizua nga kancelari gjerman Friedrich Merz dhe mblodhi 26 krerë shtetesh dhe qeverish nga katër kontinente. Në të morën pjesë edhe presidenti ukrainas Volodymyr Zelensky dhe të dërguarit amerikanë Steve Witkoff dhe Jared Kushner.
Samiti u zhvillua në një moment kur vëmendja diplomatike ishte përqendruar edhe te takimi trepalësh në Kinë mes Trump, Putin dhe Xi Jinping.
Gjatë takimit në Shenzhen, Putin deklaroi se ishte i gatshëm të bënte kompromise për t’i dhënë fund luftimeve në Ukrainë, por përsëriti akuzat ndaj udhëheqjes ukrainase, duke pretenduar se Kievi nuk ishte i interesuar për një zgjidhje paqësore.
Turqia pajis ushtrinë me avionin e parë luftarak pa pilot Bayraktar Kızılelma, Erdogan: Ditë historike
Macron: Anëtarësimi i Ukrainës në NATO është i rëndësishëm për sigurinë evropiane
Si ndihmojnë në mbrojtjen e trurit nga plakja aktiviteti fizik dhe ushqyerja
- 20:34 Turqia pajis ushtrinë me avionin e parë luftarak pa pilot Bayraktar Kızılelma, Erdogan: Ditë historike
- 20:18 Tensione para Kryeministrisë, policia nis shoqërimin e protestuesve
- 20:15 Iu dëmtuan ambasadat në Kiev nga sulmet ruse, Shqipëria shpreh solidaritet me Holandën dhe Austrinë
- 19:52 Macron: Anëtarësimi i Ukrainës në NATO është i rëndësishëm për sigurinë evropiane
- 19:34 Veteranët e UÇK-së: Protesta nëse zvarritet procesi për ndryshimet në Ligjin e Speciales
- 19:20 Si ndihmojnë në mbrojtjen e trurit nga plakja aktiviteti fizik dhe ushqyerja