Gazment Bardhi ka dhënë një sinjal për mënyrën se si Partia Demokratike do të pozicionohet në vijim ndaj protestave që prej javësh po zhvillohen në Tiranë. Në një intervistë për “Prime News24”, kreu i grupit parlamentar të PD-së bëri të ditur se partia do të angazhojë strukturat e saj në rastet kur studentët të thërrasin tubime me shtrirje kombëtare.
Bardhi shpjegoi se ditët e fundit demokratët nuk kanë pasur një organizim të centralizuar, duke iu referuar ndryshimeve dhe kundërshtive në njoftimet për zhvillimin e protestave. Megjithatë, ai pretendoi se kjo nuk nënkupton mungesë të simpatizantëve të PD-së në rrugë. Sipas tij, përfshirja e plotë e strukturave do të sillte një pjesëmarrje më të madhe.
Një tjetër çështje që u trajtua në intervistë ishte raporti mes protestuesve dhe përfaqësuesve të opozitës. Bardhi tha se nuk ka konstatuar një refuzim të përgjithshëm ndaj figurave të PD-së, por pranoi se në mesin e pjesëmarrësve ka qëndrime të ndryshme për drejtues të caktuar politikë.
Ai kërkoi që këto kundërshti të mos kthehen në përplasje mes opozitarëve, pasi, sipas tij, kjo do të largonte vëmendjen nga kërkesa kryesore e protestës, largimi i Edi Ramës.
Ndërkohë, duke komentuar ndërhyrjen e Policisë gjatë tubimit të sotëm, demokrati e konsideroi atë të paligjshme dhe joproporcionale. Bardhi argumentoi se kufizimi i qarkullimit të automjeteve është një fenomen që shoqëron protestat dhe nuk përbën në vetvete arsye për të penguar ushtrimin e së drejtës për tubim.













