Meg Ryan mbush 65 vjeç: Martesa e trazuar, romanca me “Gladiatorin”, vajza e adoptuar dhe rikthimi në Hollywood

Dikur ishte mbretëresha e komedive romantike, ndërsa jeta e saj private u bë po aq e përfolur sa filmat. Pas viteve larg vëmendjes, aktorja po i rikthehet zhanrit që e bëri të famshme
Ajo bëri që miliona shikues të besonin në dashurinë me shikim të parë, takimet e rastësishme dhe romancat që lindin kur më së paku i presim. Buzëqeshja karakteristike, flokët biondë dhe sharmi i natyrshëm e shndërruan në simbol të një epoke të Hollywoodit.
Sot, më 19 nëntor 2026, Meg Ryan feston ditëlindjen e 65-të, me një histori personale që përmban sukses, dashuri, ndarje dhe vendime të guximshme.
Aktorja që dikur mbante titullin “e preferuara e Amerikës” ka zgjedhur prej kohësh një jetë më të qetë, por lidhja e saj me kinemanë nuk është ndërprerë.
Ëndërronte gazetarinë, por u bë mbretëresha e komedive romantike
Margaret Mary Emily Anne Hyra lindi më 19 nëntor 1961, në Fairfield të Connecticutit. Fillimisht studioi gazetari në Universitetin e Nju Jorkut, por angazhimet e para televizive ia ndryshuan drejtimin profesional.
Pas paraqitjes në filmin Top Gun, kthesa vendimtare erdhi më 1989 me When Harry Met Sally....
Roli i Sally Albrightit e bëri të famshme ndërkombëtarisht. Më pas erdhën Sleepless in Seattle, French Kiss, City of Angels dhe You've Got Mail.
Bashkëpunimet me Tom Hanksin dhe regjisoren Nora Ephron mbetën ndër kapitujt më të suksesshëm të karrierës së saj, transmeton Telegrafi.

Martesa me Dennis Quaid dhe romanca me Russell Crowe
Jeta sentimentale e Meg Ryan nuk ishte aq e qetë sa historitë romantike që interpretonte.
Me aktorin Dennis Quaid u martua në vitin 1991. Nga martesa lindi djali Jack Quaid, i cili gjithashtu ndoqi karrierën e aktrimit.
Megjithëse konsideroheshin një çift i qëndrueshëm i Hollywoodit, martesa përfundoi në vitin 2001.
Gjatë xhirimeve të filmit Proof of Life në vitin 2000, Meg u afrua me aktorin Russell Crowe, i cili kishte fituar famë të jashtëzakonshme me filmin Gladiator.
Romanca u shndërrua në temë kryesore të tabloideve. Megjithatë, aktorja ka kundërshtuar pretendimet se kjo marrëdhënie shkaktoi divorcin, duke theksuar se problemet martesore ekzistonin më herët.
Dashuria tjetër që nuk përfundoi me martesë
Më 2010, Meg filloi një lidhje me muzikantin John Mellencamp.
Marrëdhënia kaloi disa ndarje dhe ribashkime. Në vitin 2018, çifti shpalli fejesën, por vetëm një vit më vonë u nda përfundimisht.
Pas këtyre përvojave, aktorja u përqendrua gjithnjë më shumë te familja dhe jeta private.
Vajza e adoptuar dhe largimi nga Hollywoodi
Në vitin 2006, Meg adoptoi nga Kina një vajzë, Daisy True, duke nisur një kapitull tjetër të rëndësishëm personal.
Mëmësia u bë një nga përparësitë e saj. Ajo vendosi të largohej gradualisht nga ritmi i vazhdueshëm i xhirimeve dhe vëmendja mediatike.
Meg nuk e braktisi plotësisht kinemanë. Në vitin 2015 realizoi debutimin regjisorial me filmin Ithaca.
Në vitin 2023 u rikthye me komedinë romantike What Happens Later, ku luajti përkrah David Duchovnyt dhe ishte gjithashtu regjisore e bashkautore e skenarit. /Telegrafi/












































