Deputetja Elisa Spiropali, në emisionin “Top Story”, foli për zhvillimet në Asamblenë e Partisë Socialiste dhe për përjashtimin e saj nga forumet socialiste. Ajo tha se ka zgjedhur të mos marrë pjesë në debatet publike dhe nuk dëshiron interpretime për atë që ndodhi në Asamble, duke theksuar se “fjala që mbajta në Asamble nuk ka asnjë lidhje me atë që është thënë në publik”. Spiropali bëri të ditur se fjalimi i saj ishte personal dhe nuk lidhej me statutet apo zgjedhjet dhe se ajo ka folur shumë pak, pa “i dhënë ushqim debatit publik”.
Sipas saj, për rastin e pozicionit të saj në PS nuk ka pasur as propozim, as vendim formal për përjashtim. Ajo e përshkroi si të padrejtë dhe të pamjaftueshëm mënyrën se si është trajtuar çështja, duke thënë se është spekulluar dhe janë marrë vendime pa lidhje logjike. “Nuk pati as propozime, as vendime, as statut, sepse nuk ka më procese të tilla,” deklaroi Spiropali, teksa kritikoi mungesën e respektit për rregullat e lojës brenda partive.
Spiropali vuri në dukje se është 2026 dhe partitë refuzojnë të respektojnë rregullat. Ajo nuk dëshiron që as udhëheqjen e partisë, as partinë e saj ta vënë në situatën qesharake të marrjes së një “vendimi pa vendim”. Duke iu referuar deklaratave të sekretarit të përgjithshëm, Spiropali tha se i vjen keq dhe i vjen turp për faktin që ai duhet të shkojë “studio më studio dhe të diskutojë për një vendim pa vendim dhe ‘përjashtim’”.
E pyetur nëse ndihet e përjashtuar, Spiropali tha se e konsideron nder të jetë anëtare e thjeshtë e PS-së dhe shtoi se “nga anëtari i PS-së buron legjitimiteti”. Ajo kritikoi abuzimin me pushtetin, manipulimin dhe vjedhjen, duke nënvizuar se nuk ka ndërmend të merret me këtë “propozim pa vendim dhe pa votim” dhe se nuk dëshiron të vërë askënd në vështirësi. Për më shumë, ajo tha se shkoi në Kuvend sepse nuk di të jetë marrë ndonjë vendim në atë forum dhe se nuk e lëviz “qerpikun” për Asamblenë apo forume të tjera.
