Tatimi mbi Vlerën e Shtuar (TVSH) për 54 produkte të shportës bazë ushqimore pritet të ulet nga 20% në 6%, duke nisur nga 1 janari 2027. Masa është pjesë e Paketës Fiskale 2027 dhe, sipas Ministrisë së Financave, synon të ulë koston e produkteve të përditshme për familjet shqiptare.
Ministri i Financave, Petrit Malaj, bëri të ditur se kjo ndërhyrje do t’i kushtojë buxhetit të shtetit më shumë se 130 milionë euro në të ardhura të munguara.
“Është një nismë që kërkon një angazhim të madh financiar, pasi bëhet fjalë për mbi 130 milionë euro të munguara në buxhetin e shtetit si rezultat i kësaj politike”, u shpreh Malaj.
Lista e 54 produkteve që do të përfitojnë nga ulja e TVSH-së është ende në proces hartimi. Ministria e Financave po punon për përcaktimin e saj në bashkëpunim me administratën tatimore dhe doganore, ndërsa miratimi në Këshillin e Ministrave pritet të bëhet brenda këtij viti.
“Ministria e Financave, në bashkëpunim me Tatimet dhe Doganat, është duke punuar për listën e produkteve të shportës, e cila brenda këtij viti do të miratohet në Këshillin e Ministrave. Planifikimi ynë është që kjo ulje e çmimit të produkteve të shportës të hyjë në fuqi nga data 1 janar 2027”, deklaroi ministri.
Sipas Malajt, synimi është që ulja e taksës të reflektohet drejtpërdrejt në çmimet që paguajnë konsumatorët për ushqimet e përditshme.
“Angazhimi ynë është që kjo ulje e taksës të reflektohet në çmimet që familjet shqiptare paguajnë çdo ditë”, theksoi ai.


