Elisa Spiropali, në emisionin “Top Story”, foli për arsyet që, sipas saj, çuan në largimin e saj nga posti i ministres së Jashtme dhe në pikënisjen e përplasjeve me Edi Ramën. Ajo u ndal veçanërisht te qëndrimi i saj ndaj rastit të Belinda Ballukut dhe pranoi se mosvotimi për heqjen e imunitetit të Ballukut ishte një akt politik.
Spiropali theksoi se vendimi i saj nuk kishte të bënte me mbrojtje personale të Ballukut, por me refuzimin e një modeli të caktuar qeverisjeje që Balluku, sipas saj, përfaqëson. Ajo shpjegoi se akuzat për antiligjshmëri dhe lidhje me partnerë janë, siç tha, “mënyra më primitive për të adresuar problematika që nuk kanë lidhje me të” dhe se për syrin e saj problemi qëndron te modeli i qeverisjes, jo tek emrat individualë.
Në fjalën e saj Spiropali tha: “Nëse mund ta them me emër, për Belinda Ballukun, dhe kam bërë një akt politik, mosvotimi për heqjen e imunitetit. Jo se dua të shoh një grua në pozita të tilla, por për shkak të moslegjitimitetit të modelit. Këtu fillon dhe mbaron problemi.” Ajo shtoi se, edhe pse kanë dalë emra të njerëzve që kanë shpërndarë favore politike, “a ka vlerë emrat? Jo, vlerë ka modeli.”
Spiropali u shpreh se beson se Balluku është “modeli më i keq i qeverisjes në forcën tonë politike” dhe e përshkroi atë si “viktimën më të freskët të një modeli që duhet të ndryshojë.” Megjithatë, ajo tha se ndien keqardhje për Ballukun në një plan më njerëzor: për faktin që është grua, për fëmijët e saj dhe “madje edhe për shpirtin e saj,” duke shtuar “lutem”.
Gjatë deklaratave të saj, Spiropali përsëriti se qëndrimi që mbajti ishte një akt politik i motivuar nga refuzimi ndaj legjitimitetit të një modeli të qeverisjes, dhe se kjo ishte baza e vendimit të mosvotimit, jo një mbrojtje personale ndaj Ballukut.
