Kosovë/ Policia kontrollon 102 lokale, 8 të arrestuar për prostitucion, mes tyre edhe një shqiptar
Erërat e fuqishme që kanë përfshirë disa rajone të Kosovës kanë shkaktuar dëme të konsiderueshme materiale, ndërsa në Ferizaj është ndërprerë energjia elektrike si masë parandaluese për sigurinë e qytetarëve.
Në Ferizaj, erërat e forta kanë rrëzuar çatinë e një objekti, ndërsa dëmtime janë regjistruar edhe në infrastrukturën energjetike. Për këtë arsye, me kërkesë të Policisë së Kosovës, kompania KEDS ka ndërprerë furnizimin me energji elektrike në këtë qytet.
“Si rezultat i situatës aktuale, ku erërat e forta kanë shkaktuar dëme dhe avari të konsiderueshme në infrastrukturën energjetike, dhe me kërkesë të Policisë së Kosovës, KEDS njofton publikun për nevojën e domosdoshme për ndërprerjen e energjisë elektrike në Ferizaj. Kjo ndërprerje është si masë preventive me qëllim sigurinë e përgjithshme të qytetarëve. Ekipet tona janë në terren dhe në koordinim të plotë me institucionet gjegjëse”, thuhet në njoftimin e KEDS-it.
Dëme materiale janë raportuar edhe në Prizren, Krushë të Madhe të Rahovecit dhe Lipjan.
Ndërkohë, në Prishtinë, një dritare ka rënë nga një ndërtesë duke dëmtuar një automjet, ndërsa në një lagje tjetër të kryeqytetit erërat e fuqishme kanë shkatërruar kënde lojërash.
Top Channel