Drejtori i Përgjithshëm i Tatimeve, Ilir Binaj, ka reaguar publikisht pas deklaratave të deputetes Elisa Spiropali, duke e akuzuar atë dhe bashkëshortin e saj për ushtrim presioni të paligjshëm ndaj Administratës Tatimore, në lidhje me kontrollet e kryera ndaj bizneseve familjare.
Në një deklaratë publike, Binaj thotë se kontrollet në sektorin e ndërtimit janë zhvilluar në bazë të analizës së riskut dhe denoncimeve të qytetarëve, në kuadër të luftës kundër evazionit fiskal. Sipas tij, në këtë proces janë përfshirë edhe subjekte që lidhen me deputeten socialiste.
Ai pretendon se rezultatet e kontrolleve nuk janë pritur mirë nga Spiropali dhe bashkëshorti i saj, të cilët, sipas tij, kanë ushtruar presion dhe kanë kërcënuar inspektorët tatimorë, madje edhe familjarët e tyre.
Binaj thekson se për këto pretendime ka fakte të verifikueshme dhe denoncime pranë organeve ligjzbatuese, ndërsa shton se procedurat e kontrollit janë të dokumentuara dhe gjetjet kanë evidentuar dyshime për evazion tatimor në përmasa të mëdha.
Për këtë arsye, sipas drejtorit të Tatimeve, dosjet e subjekteve të dyshuara po referohen pranë organeve ligjzbatuese për veprime të mëtejshme.
Në reagimin e tij, Binaj ka sqaruar edhe marrëdhënien me ish-zëvendëskryeministren Belinda Balluku, duke deklaruar se nuk e ka takuar asnjëherë personalisht, përveç takimeve publike për shkak të detyrës. Ai thotë se është kthyer nga SHBA-ja për t’i shërbyer vendit, pas një karriere në fushën e auditimit financiar.
Në fund, drejtori i Tatimeve i kërkon Spiropalit të mos e përmendë më emrin e tij, duke theksuar se është nëpunës i shtetit dhe nuk merret me politikë.
Ai i kujton deputetes se, si ish-drejtoreshë e Doganave, duhet ta dijë se presioni dhe intimidimi i administratës publike përbëjnë shkelje të rënda etike dhe ligjore.


