
Bangladeshi është përfshirë nga trazirat këtë javë, pasi mbështetësit e ish-udhëheqëses në mërgim, Sheikh Hasina, u përpoqën të impononin një “bllokim kombëtar” për të kërkuar kthimin e saj.
Sheikh Hasina, e cila drejtoi Bangladeshin për 15 vjet, ka deklaruar synimin e saj për t’u kthyer në vend nga India, ku jeton që prej vitit 2024, kur një kryengritje e udhëhequr nga studentët i dha fund sundimit të saj autoritar, shkruan Ft.
Ajo u dënua me vdekje në mungesë vitin e kaluar, në lidhje me një operacion shtypjeje gjatë të cilit u vranë deri në 1.400 persona, sipas Kombeve të Bashkuara. Ajo ka mohuar përgjegjësinë dhe e ka cilësuar dënimin e saj si “të njëanshëm dhe të motivuar politikisht”.
Qeveria ka refuzuar t’i lëshojë Sheikh Hasinës një pasaportë. Ministri i Shtetit për Punët e Jashtme të Bangladeshit, Humaiun Kobir, i tha Financial Times se ish-udhëheqësja do të kthehej vetëm “me pranga në duar” ose nën “masa të rrepta mbikëqyrjeje”, pasi të ekstradohej për të vuajtur dënimin.
“Terroristëve nuk u lëshohen pasaporta”, shtoi ai.
Strehimi i Sheikh Hasinës në Indi ka mbetur një pikë mosmarrëveshjeje mes Nju Delhit dhe Dhakës, e cila ka kërkuar vazhdimisht ekstradimin e saj, sipas diplomatëve të lartë bangladeshas. Ministria e Jashtme e Indisë tha se kërkesat po shqyrtoheshin në kuadër të procedurave të saj ligjore të përcaktuara.
Kryeministri Tarique Rahman akuzoi të enjten Lidhjen Awami të Sheikh Hasinës, tashmë të ndaluar, se po organizonte dhunën për të destabilizuar qeverinë e tij nga “vendi përtej kufirit” — një referencë ndaj Indisë.
Dhuna shpërtheu këtë javë, ndërsa mbështetësit e Lidhjes Awami u përpoqën të ndalonin transportin publik dhe të detyronin bizneset të mbylleshin. Kjo bëri që autoritetet të dislokonin forcat e sigurisë në disa zona të vendit me 175 milionë banorë. Tre aktivistë politikë, përfshirë drejtues të Partisë Nacionaliste të Bangladeshit (BNP) të Rahmanit, u vranë, sipas zëdhënësit të kryeministrit, Mahdi Amin.
“Ata po sulmojnë aktorët pro-demokracisë, përfshirë pronat që u përkasin deputetëve të BNP-së”, tha ai. “Anëtarë të Lidhjes Awami janë kapur duke kryer zjarrvënie dhe duke hedhur bomba me benzinë dhe kokteje Molotov.”
Mohammad Ali Arafat, një zyrtar i lartë i Lidhjes Awami, mohoi që partia të ishte përgjegjëse për trazirat. Ai shtoi se zyrtarët në Dhaka po i kërkonin Interpolit dhe Indisë që ta dërgonin Sheikh Hasinën “përsëri këtu, por kur ajo thotë se dëshiron të kthehet, ata përgjigjen: ‘Jo, nuk duam që ajo të kthehet’”.
Në Gopalganj, qytetin e lindjes së Sheikh Hasinës dhe një bastion të Lidhjes Awami, u dogjën komisariate policie dhe demonstruesit rrëzuan një monument që përkujtonte fundin e qeverisjes së saj.
“Lëvizja jonë në rrugë do të vazhdojë derisa të arrijmë ta kthejmë ish-kryeministren dhe vajzën e Bangabandhut, Hasinën”, i tha një tubimi në Gopalganj drejtuesi i degës lokale të Lidhjes Awami, Ilyas Haque, duke iu referuar të atit të saj dhe heroit të pavarësisë së Bangladeshit, Sheikh Mujibur Rahman.
Edhe rezidenca stërgjyshore e Muhammad Yunus, laureatit të Çmimit Nobel që drejtoi një qeveri të përkohshme pas rrëzimit të Sheikh Hasinës, u dogj në qytetin portual të Chattogramit. Disa anëtarë të Lidhjes Awami janë arrestuar.
Rahman po përballet gjithashtu me presionin në rritje ekonomik, pasi dhuna në rrugë përkon me javën e tretë të protestave të punëtorëve të industrisë së veshjeve, të cilët kërkojnë paga më të larta.
Demonstratat kanë ndërprerë aktivitetin në qindra fabrika, duke penguar prodhimin në të gjithë industrinë e eksportit të veshjeve në Bangladesh, e cila është e dyta më e madhe në botë pas Kinës dhe përbën më shumë se 80 për qind të të ardhurave totale të vendit nga eksportet.
Gjigantë ndërkombëtarë të shitjes me pakicë, përfshirë H&M dhe Inditex, pronaren e Zara-s, kanë “shprehur shqetësime” për ndërprerjet e prodhimit dhe vonesat në dërgesa, tha Mahmud Hasan Khan, president i Shoqatës së Prodhuesve dhe Eksportuesve të Veshjeve të Bangladeshit. “Po përpiqemi t’i mbajmë fabrikat në punë, por shumë prej tyre nuk munden, pasi trazirat po vazhdojnë”, tha ai.
Një drejtues sindikal me përvojë në Savar, një qendër e prodhimit të veshjeve në periferi të Dhakës, i cili kërkoi të mbetej anonim pasi disa zyrtarë sindikalë u ndaluan, tha se organizatorët po u kërkonin punëtorëve të ktheheshin në vendet e punës, por po humbnin gjithnjë e më shumë kontrollin mbi turmat.
“Protestat për pagat po përfshihen padyshim në dhunën që lidhet me mbështetësit e Lidhjes Awami”, tha drejtuesi sindikal. Ai shtoi se qeveria i kishte “menaxhuar keq negociatat” për rritjen e pagave, duke shtuar pakënaqësinë e punëtorëve.
“Një pjesë e këtij zemërimi mund të ishte shmangur.”