Ekipi ligjor i presidentit Donald Trump festoi të enjten pasi një gjykatës rrëzoi kërkesën e gazetës “The New York Times” për pushimin e padisë prej 15 miliardë dollarësh për shpifje, të ngritur nga presidenti kundër saj.
Gjykatësi federal Steven D. Merryday lejoi që katër pika të padisë, të mbështetura në shtatë akuza konkrete për veprimtari kriminale, të shqyrtohen më tej. Ekipi ligjor i Trump kishte argumentuar se gazeta “The New York Times” dhe shtëpia botuese Penguin Random House kishin treguar shpërfillje të pamatur ndaj së vërtetës, duke pretenduar se autorët kishin shmangur qëllimisht verifikimin e fakteve në një libër të shkruar nga gazetarë të gazetës.
“Presidenti Trump vazhdon t’i kërkojë llogari mediave të rreme për mashtrimin e popullit amerikan. Gjykatësi Merryday ka marrë vendimin e duhur duke rrëzuar kërkesën për pushimin e çështjes të paraqitur nga ‘The New York Times’, Penguin Publishing dhe autorët e saj, lidhur me padinë e presidentit Trump për shpifje”, i tha një zëdhënës i ekipit ligjor të Trump medias Fox News Digital.
“Këta të pandehur tani do të duhet të përgjigjen për shpifjen e qëllimshme dhe dashakeqe ndaj presidentit Trump”, vijoi zëdhënësi. “‘The New York Times’ ka një histori të gjatë shpifjesh ndaj presidentit Trump, në shërbim të agjendës së saj politike të majtë. Vendimi i rëndësishëm i sotëm është një fitore për të vërtetën në Amerikë.”
Në vendimin e tij, gjykatësi Merryday kritikoi ashpër Susanne Craig dhe Russ Buettner, autorët e librit “Lucky Loser: How Donald Trump Squandered His Father’s Fortune and Created the Illusion of Success”. Ai i kritikoi për publikimin e pretendimeve kategorike për mashtrim të ndërlikuar fiskal dhe pastrim parash, pa u mbështetur në një opinion ligjor zyrtar apo në një auditim mjekoligjor.
Merryday vuri në dukje se Trump dhe babai i tij ishin akuzuar për këto veprime, ndonëse ndaj tyre nuk ishin ngritur akuza penale dhe as nuk ishin shpallur fajtorë.
“Me fjalë të tjera, faktet e paraqitura në ankesë krijojnë të paktën një bazë të besueshme për të arritur në përfundimin se autorët dhe botuesit e dinin që nuk mund të nxirrej asnjë përfundim i besueshëm për shkeljen e ligjeve tatimore, veçanërisht atyre që lidhen me taksën mbi trashëgiminë dhe dhuratat, pa u mbështetur në një opinion të hartuar nga ekspertë të kualifikuar, pas kryerjes së kërkimeve dhe analizave të nevojshme faktike dhe ligjore. Megjithatë, ata me vetëdije nuk kërkuan një opinion të tillë”, shkroi Merryday.
Gjykata hodhi poshtë argumentet e gazetës “The New York Times”, e cila ishte mbështetur te mendimet e disa komentuesve të jashtëm. Mes tyre ishte një ish-prokuror që kishte thënë se një transaksion i Trump-it “mban erë krimi”, si dhe një profesor që e kishte cilësuar veprimin “të dyshimtë”.
“Është e qartë se edhe një ekspert i kualifikuar, kur jep një vlerësim sipërfaqësor, si për shembull se një transaksion është ‘i dyshimtë’ ose ‘mund’ të shkelë ligjin, kur i atribuon një transaksioni ‘erën’ e një krimi, apo kur vëren se një deklaratë tatimore për dhuratat mund t’i shpëtojë kontrollit të Shërbimit të të Ardhurave të Brendshme (IRS), nuk jep një opinion ligjor zyrtar. E njëjta gjë vlen edhe kur një ekspert vë plot bujari në dispozicion kohën e tij jashtëzakonisht të vlefshme për të ndihmuar persona pa njohuri të specializuara, të cilat janë ‘humbur në hollësi’. Asnjë nga këto nuk mjafton për të larguar dyshimet serioze mbi vërtetësinë dhe saktësinë e një deklarate që akuzon një person të caktuar për mashtrim, evazion fiskal apo një krim tjetër të lidhur me një transaksion konkret”, shkroi Merryday.
Megjithëse padia e Trump-it do të vazhdojë, Merryday rrëzoi edhe dy pika të tjera të saj dhe hodhi poshtë 27 deklarata të tjera të kundërshtuara, duke i cilësuar si pretendime për të cilat nuk mund të ngrihet padi, në bazë të mbrojtjes së rreptë që Amendamenti i Parë i Kushtetutës amerikane i garanton lirisë së shprehjes dhe shtypit, si dhe precedentit gjyqësor New York Times Co. kundër Sullivan. Gjithashtu, ai refuzoi kërkesën e Trump-it për ta ndryshuar për herë të tretë padinë.
Një zëdhënës i “The New York Times” i dha këtë deklaratë Fox News Digital: “Na inkurajon fakti që gjykatësi Merryday hodhi poshtë pothuajse të gjitha pretendimet kundër nesh. Ne vazhdojmë të besojmë se pretendimi i mbetur në padi nuk ka asnjë bazë ligjore. Presim me padurim ta argumentojmë këtë qëndrim, ndërsa vazhdojmë të mbrohemi nga ky sulm i pabazë ndaj gazetës ‘The Times’ dhe të drejtave të shtypit të lirë dhe të pavarur në këtë vend.”
Gjykatësi urdhëroi gazetën “The New York Times” të paraqesë përgjigjen e saj zyrtare brenda 28 ditësh. / Fox News – Syri.net
© SYRI.net