Çollaku: Rama duhet të thërritet të dëshmojë për Agasin, SPAK të arrestojë Ballukun!
Analisti Basir Çollaku ka ngritur akuza të forta lidhur me dosjen e Ergys Agasit, duke e cilësuar atë si një çështje me përmasa ndërkombëtare dhe duke kërkuar që kryeministri Edi Rama të thirret për të dhënë shpjegime përpara prokurorëve të SPAK.
I ftuar në emisionin “Kjo Javë”, Çollaku deklaroi se hetimi nuk mund të konsiderohet i plotë nëse organi i akuzës nuk merr në pyetje kreun e qeverisë. Sipas tij, mosmarrja e dëshmisë së Ramës përbën një pengesë për zbardhjen e plotë të çështjes.
Analisti pretendoi se në skemën që po hetohet kanë qenë të përfshirë drejtues të disa institucioneve të rëndësishme shtetërore, duke përmendur Shërbimin Informativ Shtetëror, Policinë e Shtetit dhe Agjencinë Kombëtare të Shoqërisë së Informacionit (AKSHI).
Çollaku ngriti pikëpyetje edhe mbi mënyrën se si janë përzgjedhur drejtuesit e këtyre institucioneve, duke argumentuar se emërimet janë bërë nga njerëz të besuar të kryeministrit, pa kaluar, sipas tij, filtrat e nevojshëm të sigurisë.
Ai e cilësoi situatën si një cenim të rëndë të sigurisë kombëtare dhe kërkoi që hetimet të mos kufizohen vetëm te personat e përfshirë drejtpërdrejt në dosje.
Sipas Çollakut, Prokuroria e Posaçme duhet të zgjerojë hetimin dhe të kërkojë përgjegjësi edhe për çështje të tjera të rëndësishme, ku përmendi dosjen e SHISH-it, AKSHI-n, inceneratorët, termocentralet e Vlorës dhe aeroportin e Vlorës.
Analisti këmbënguli se Edi Rama duhet të dëshmojë për të sqaruar rrethanat dhe përgjegjësitë që mund të lidhen me emërimet dhe funksionimin e institucioneve të përfshira në hetime.
Çollaku kërkon masë më të ashpër ndaj Ballukut: Akuza të shumta, SPAK duhet të kërkojë arrestimin
Basir Çollaku komentoi edhe zhvillimet e reja në hetimet e SPAK ndaj ish-zëvendëskryeministres Belinda Balluku, duke kërkuar që ndaj saj të merret një masë sigurie më e rëndë.
Sipas analistit, pesha e akuzave dhe dyshimet për abuzime me miliona euro nuk justifikojnë vijimin e qëndrimit të saj në liri. Ai pretendoi se ekzistojnë rrethana që kërkojnë një reagim më të fortë nga Prokuroria e Posaçme.
Çollaku u ndal edhe te mundësia e ngritjes së akuzës për grup të strukturuar kriminal, duke argumentuar se dyshimet për abuzime financiare në përmasa të tilla duhet të hetohen në një kuadër më të gjerë.
Ai përmendi gjithashtu deklaratat e Elisa Spiropalit, e cila ka pretenduar se persona të lidhur me Belinda Ballukun e kanë kërcënuar, duke e konsideruar këtë një element që duhet të merret në shqyrtim nga organet e drejtësisë.
“Balluku konsumon aktivitet kriminal në liri”, u shpreh Çollaku, duke insistuar se SPAK duhet të kërkojë një masë tjetër sigurie dhe të mos mjaftohet me situatën aktuale procedurale.
Analisti iu referua edhe deklarimeve të prokurorëve lidhur me dënimin e mundshëm të Ballukut, që sipas tij mund të arrijë deri në 35 vite burg, për të argumentuar se ekzistojnë arsye të mjaftueshme për të kërkuar një masë më të rëndë.
Në vijim, ai kritikoi mënyrën se si po trajtohet çështja në raport me Kuvendin, duke theksuar se Prokuroria duhet të ushtrojë kompetencat e saj dhe të paraqesë kërkesën për autorizimin e arrestimit, ndërsa vendimmarrja e Parlamentit është një çështje më vete.
Çollaku shkoi edhe më tej, duke ngritur mundësinë e hetimit për pengim të drejtësisë ndaj personave që, sipas tij, mund të ndërhyjnë për të penguar arrestimin e ish-zëvendëskryeministres.
Keni një histori? Denonco anonimisht, identiteti juaj mbrohet.
Denonco



