Ministri i Shëndetësisë i Kosovës, Arben Vitia, dhe ministrja e Shëndetësisë e Shqipërisë, Klodiana Spahiu, kanë vizituar Spitalin e Përgjithshëm “Isa Grezda” në Gjakovë.

Lajmi është bërë i ditur nga vetë spitali, përmes një njoftimi publik, ku thuhet se dy ministrat janë pritur nga udhëheqja e institucionit dhe janë njoftuar nga afër me punën, rezultatet dhe kapacitetet e tij.


Gjatë vizitës, ministrat kanë parë nga afër Shërbimin e Emergjencës, Njësinë Koronare, si dhe Repartin e Gjinekologjisë dhe Obstetrikës, ku janë takuar edhe me profesionistët shëndetësorë.

Një vëmendje e veçantë gjatë takimit i është kushtuar edhe shërbimeve që Spitali i Gjakovës ofron për qytetarët nga Shqipëria, veçanërisht nga Bajram Curri, Tropoja, Kruma dhe Hasi.

Në njoftimin e spitalit thuhet se kjo vizitë përfaqëson më shumë sesa një takim institucional, duke e cilësuar atë si shprehje të respektit për punën e personelit shëndetësor dhe si mesazh të afërsisë e bashkëpunimit ndërmjet Kosovës dhe Shqipërisë.

Spitali i Përgjithshëm “Isa Grezda” ka falënderuar të dy ministrat për vizitën dhe vëmendjen e treguar ndaj institucionit dhe stafit të tij. /Telegrafi/