Një natë e paharrueshme për Leandro Paredes dhe Boca Juniors në Estadio Metropolitano Roberto Meléndez të Barranquillas, ku skuadra argjentinase fitoi Copa Sudamericana, duke mposhtur Atlético Mineiron 2-0, dhe duke fituar një trofe ndërkombëtar pas 18 vitesh pritjeje. Mesfushori argjentinas, ish-lojtar i Romës dhe Juventusit, ishte një nga protagonistët kryesorë dhe u zëvendësua në minutën e 58-të duke i hapur vend Tomás Belmonte-s, ndërkohë që tifozët e Boca Juniors brohoritën emrin e tij dhe e duartrokisnin intensivisht. Zëvendësimi u bë për shkak të rënies së tensionit që Paredes pësoi nga nxehtësia e përvëluese e Kolumbisë, mbi 35 gradë Celsius, dhe dehidrimit.
Pas ndeshjes, si kapiten ai ngriti lart trofeun dhe shpërtheu në lot në fushë së bashku me familjen, por festa mori ngjyrë frike gjatë një interviste për Dsports. I dukshëm i rraskapitur dhe i emocionuar, Paredes nisi të falënderonte për triumfin, por papritur ktheu kokën anash dhe u shemb në tokë në transmetim të drejtpërdrejtë. Regjia televizive ndërpreu menjëherë intervistën dhe kaloi pamjet te fusha, ndërsa stafi mjekësor ndërhyri shpejt për ndihmën e parë. Ai u përmend shpejt, por u transportua në një klinikë në Barranquilla për kontrolle paraprake, gjë që shtyu me disa orë kthimin e ekipit në Argjentinë.
Trajneri i Boca Juniors, Rodolfo “Vasco” Arruabarrena, shpjegoi në konferencë për shtyp: “Ai kishte filluar të ndiente marramendje dhe një rënie të gjendjes fizike që në fund të pjesës së parë. Gjatë pushimit dukej se ishte rikuperuar, por pas dhjetë minutash në pjesën e dytë e kishte të vështirë të lëvizte në mënyrë laterale dhe ishte i sinqertë kur kërkoi zëvendësimin. Përtej klasit të jashtëzakonshëm që shfaq në fushë, ai është një lider pozitiv, që nxjerr më të mirën nga të gjithë”.
Çdo shqetësim u shua kur Paredes publikoi nga klinika një foto me fanellën e Boca dhe mesazhin: “Jam mirë! Rroftë Boca, sot dhe përgjithmonë. Faleminderit të gjithëve për mesazhet. Ishte thjesht një marramendje e shkaktuar nga gjithë ato rrotullime njëra pas tjetrës”. Ai përshkroi gjithashtu kënaqësinë e rikthimit: “Kam realizuar një ëndërr. Kjo është një lumturi e papërshkrueshme”.
