Një seri zgjedhjesh në disa vende kyçe të Evropës gjatë 13 muajve të ardhshëm mund të ndryshojë ndjeshëm ekuilibrat politikë brenda Bashkimit Evropian. Partitë nacionaliste dhe të ekstremit të djathtë po forcojnë mbështetjen, duke rritur mundësinë e formimit të një blloku euroskeptik që mund të vërë në vështirësi vendimmarrjen në Bruksel. Analiza e The Guardian vë në qendër zgjedhjet në Spanjë, Francë, Poloni dhe Itali, ku forcat nacionaliste synojnë përfitime të mëdha, si dhe gara në Greqi, Estoni, Finlandë, Sllovaki dhe zgjedhjet rajonale në Gjermani.
Cikli zgjedhor nis më 29 nëntor në Spanjë, ku kryeministri socialist Pedro Sanchez rrezikon të humbasë ndaj Partisë Popullore dhe ekstremit të djathtë Vox, që kanë bashkëpunuar në disa rajone. Në Francë, Marine Le Pen i Tubimit Kombëtar konsiderohet ndër favoritët kryesorë për presidencë, me avantazh ndaj Jean-Luc Mélenchon dhe forcave të fragmentuara të qendrës. Në Poloni, partitë nacionaliste po rrisin ndikimin dhe mund të minojnë koalicionin proevropian të Donald Tusk nëse bashkojnë mbështetjen. Në Itali, kryeministrja Giorgia Meloni synon mandat të dytë përpara fundit të 2027, por përballet me presion nga forca më radikale e Roberto Vannacci-t, E ardhmja Kombëtare.
Edhe pse mbështetja për Bashkimin Evropian mbetet e lartë — sipas të dhënave të cituara 74% e evropianëve mendojnë se vendi i tyre përfiton nga anëtarësimi në BE — afërsisht një në katër votues tani mbështet partitë e ekstremit të djathtë, një rritje e konsiderueshme që nis nga mesit i viteve 1990. Faktorë si stagnimi ekonomik, masat shtrënguese, plakja demografike dhe presioni mbi financat publike kanë dobësuar partitë tradicionale. Çështjet që nxisin përplasje politike përfshijnë emigracionin, tranzicionin e gjelbër, mbështetjen për Ukrainën dhe globalizimin; përmendet gjithashtu ndikimi i dezinformimit rus dhe mbështetja e administratës Trump për partitë patriotike.
Franca shihet si pika më kritike: programi i Le Pen parashikon reduktim me 11 miliardë euro të kontributit francez në buxhetin e BE-së, referendumin kushtetues për përparësi të ligjit francez ndaj atij evropian dhe moszbatim të disa rregullave të tregut të përbashkët. Analistët paralajmërojnë se një bllok euroskeptik mund të pengojë vendime kyçe si buxheti i BE-së, ndihma për Ukrainën, zgjerimi dhe bashkëpunimi në mbrojtje, energji, financa dhe teknologji, duke dobësuar gradualisht kapacitetin veprues të Evropës.
