
Lionel Messi ishte protagonist i një ndeshjeje me dy fytyra për Inter Miami kundër Columbus Crew, e vlefshme për play-off-et e Major League Soccer. Pasi u nderua me Këpucën e Artë për 26 golat e shënuar në sezonin e rregullt, ylli argjentinas u përfshi në një incident nervozizmi, duke goditur me top në fytyrë kundërshtarin Gonzalo Tapia gjatë një rivënieje anësore. Ky veprim i solli Messit vetëm një karton të verdhë, ndërsa kundërshtarët kërkuan ndëshkimin me të kuq. Për të plotësuar tablonë negative, Inter Miami pësoi një humbje të thellë 3-0, duke u gjendur tani vetëm një hap larg eliminimit nga gara.
Tensioni shpërtheu në kohën shtesë të pjesës së parë, kur Inter Miami ishte tashmë në disavantazh me një gol dhe me dhjetë lojtarë në fushë. Ndërsa Messi po përgatitej të ekzekutonte një rivënie anësore, Tapia u pozicionua para tij, duke synuar të pengonte rifillimin e lojës. Numri 10 i Inter Miami nuk e pëlqeu këtë veprim dhe e gjuajti topin direkt në fytyrën e lojtarit kilian, i cili ra në tokë duke vënë duart në fytyrë. Arbitri nxori dy kartonë të verdhë: një për Tapian, për pengimin e rivënies, dhe një për Messin. Ky vendim la shumë pikëpyetje në stolin e Columbus Crew. Pas ndeshjes, trajneri Laurent Courtois kundërshtoi mungesën e kartonit të kuq, duke e konsideruar gjestin të denjë për përjashtim. Megjithatë, arbitri Chapman shpjegoi se nuk kishte parë elemente për sjellje të dhunshme, duke e konsideruar forcën e goditjes të pamjaftueshme. Messi mbeti kështu në fushë, por reagimi i tij padyshim që vodhi skenën.
Ndeshja kishte nisur me një festë për Messin, i cili u shpërblye me Këpucën e Artë të MLS për 26 golat e tij në sezonin e rregullt. Megjithatë, Columbus Crew nuk humbi kohë, duke ndryshuar skenarin brenda nëntë minutash: Tapia zhbllokoi rezultatin nga penalltia. Situata u komplikua më tej për vendasit në minutën e 36-të, kur Gonzalo Luján u përjashtua me karton të kuq pas dy kartonëve të verdhë. Në pjesën e dytë, mysafirët thelluan epërsinë, duke shënuar golin e dytë me Taha Habroune në minutën e 52-të dhe golin përfundimtar 3-0 sërish me Tapian, i cili realizoi një dygolësh, gjashtë minuta më vonë.
Messi u përpoq të frymëzonte shokët e tij të skuadrës, por nuk arriti të mposhtte portierin Patrick Schulte. Për Inter Miami, kampionët në fuqi, rruga drejt titullit bëhet menjëherë e vështirë: më 27 nëntor, në Columbus, do të duhet një fitore për të shmangur eliminimin dhe për të çuar serinë në ndeshjen e tretë vendimtare.
Marrë nga La Gazzetta dello Sport
