Hetimi për tokat ndaj ish-deputetit socialist Jurgis Çyrbja u mbyll pa asnjë aktakuzë, ndërsa dy vite më parë ai kishte dhënë dorëheqjen nga mandati. Burime për TCH thanë se pasi prokurori i dosjes, Dritan Prençi, shpalli moskompetencën dhe kaloi materialet nga SPAK në Prokurorinë e Durrësit, hetuesit konkluduan se Çyrbja, si ish-regjistrues i pronave, nuk kishte kryer vepër penale. Sipas kronologjisë hetimore, çështja kishte nisur dhe ishte ndjekur nga SPAK, por tani është mbyllur.
Në aktet e dosjes ku është shpallur pushimi i hetimeve, Prokuroria e Durrësit deklaron se nuk provohet që ish-funksionari të ketë marrë pjesë në falsifikimin e dokumenteve, të ketë pasur dijeni për falsitetin e tyre apo të ketë bashkëpunuar me të tjerë për përfitim personal gjatë regjistrimeve të tokave. Në disa prej aplikimeve, shton Prokuroria, Çyrbja kishte kërkuar plotësimin e dokumentacionit ligjor përpara vijimit të procedurës. Për këto arsye, Prokuroria i kërkon gjykatës pushimin e akuzës për shpërdorim detyre ndaj tij. Në të njëjtën kohë, në gjykatë janë dorëzuar si të pandehur Hysen Gashi dhe Qamil Lila.
Në kulmin e hetimeve për çështjen e tokave, Çyrbja dha dorëheqjen nga mandati; por një tjetër prokuror i SPAK e hetu për dyshime të tjera që çuan më pas në paraburgim. Për dosjen e dytë, e bazuar në biseda të regjistruara përmes aplikacionit SkyEcc, ai u gjykua për korrupsion në zgjedhje dhe për nxjerrje të sekreteve të policisë, të cilat sipas SPAK, i përdoreshin anëtarëve të grupeve kriminale. Avokati i ish-deputetit ka hedhur poshtë përdorimin e SkyEcc nga klienti i tij, duke insistuar se Çyrbja nuk e ka përdorur kurrë aplikacionin.
SPAK e ka gjetur më tej fajtor Çyrbjen në këtë pjesë dhe, pas ekzekutimit të dënimit prej dy vjet burg, ai është liruar nga qelia në shkurt të këtij viti. Çyrbja i është drejtuar Gjykatës së Lartë, ku pretendon pafajësi; si mbështetje ofron, sipas tij, një shkresë të Policisë së Shtetit që deklaron se nga 29 dhjetori 2020 deri më 7 mars 2021 policia nuk kishte pasur plan masash për arrestime në zonat Manëz‑Maminas dhe Sallmone, dhe për pasojë nuk kishte si t’i njoftonte personat e kërkuar.
