Moderatorja dhe ish-politikania Grida Duma ka folur hapur për jetën e saj emocionale, vetminë dhe vështirësinë për të shfaqur dobësitë, pavarësisht imazhit të një gruaje gjithmonë të fortë.
E ftuar në emisionin “Goca dhe Gra”, në një bisedë me Ema Andrean, Duma u pyet se cila është pika e saj më e dobët. Ajo tha se forca që e ka karakterizuar ndër vite është njëkohësisht edhe dobësia e saj, pasi ka ndikuar në mënyrën se si të tjerët e perceptojnë dhe i afrohen.
“Pika ime e dobët është pika ime e fortë. Dobësia ime është forca ime. Domethënë, nuk ka nevojë të jem kaq e fortë sa jam. Të jesh gjithnjë e fortë largon njerëz nga vetja. Më mungon empatia e të tjerëve, më mungon fakti që nuk ma kupton asnjëherë askush që vuaj”, u shpreh ajo.
E pyetur nga Andrea nëse e kishte paguar lirinë me vetmi, Duma u përgjigj se kjo kishte qenë pikërisht kostoja e zgjedhjeve të saj.
“Absolutisht po. Sa herë që më thonë: ‘Je bërë virale sot, ka ndodhur kjo gjëja’, u them: ‘Le të jetë, nuk më merr njeri më sysh, se e kam paguar unë koston e vetes’”, rrëfeu moderatorja.
Ajo pranoi se do të dëshironte të ishte më e butë me veten dhe të mos ndihej vazhdimisht e detyruar të mbante rolin e gruas së fortë. Megjithatë, sipas saj, ky ndryshim nuk është i lehtë, pasi edhe njerëzit përreth janë mësuar ta shohin gjithmonë në të njëjtën mënyrë.
Në një tjetër moment, Duma tregoi se pikërisht kur shfaq anën e saj të brishtë ndihet më e vetmuar, pasi të tjerët nuk janë mësuar ta shohin jashtë imazhit të forcës.
“Kur je e dobët, nuk ta pranojnë atë dobësi dhe ai është momenti më vetmitar”, tha ajo.
Në fund të bisedës, moderatorja foli edhe për përplasjen mes asaj që dëshiron dhe asaj që ndien se duhet të bëjë. Ajo pranoi se në jetën e saj përgjegjësitë dhe detyrimet kanë zënë shpesh vendin e dëshirave personale.
“Unë e dua atë që duhet, megjithatë ka momente që nuk është nevoja të jetë gjithmonë në të njëjtën trajektore. Duhet dhe dua gjithë kohën, mund të jetë edhe vetëm dua, pa duhet. Dhe këtë gjë unë nuk e kam takuar akoma në jetën time. Vetëm dua, nuk e kam takuar”, përfundoi Grida Duma.


