Polonia ka bërë të ditur se ka prova që Rusia ka shkelur hapësirën e saj ajrore me tri raketa të lundrimit të tipit Kh-101, duke shtuar shqetësimet për sigurinë në krahun lindor të NATO-s.

Varshava e akuzoi Moskën një ditë më parë për shkeljen e territorit të saj ajror. Incidenti konsiderohet si rasti më i fundit në një seri shkeljesh të hapësirës ajrore të vendeve anëtare të NATO-s nga Rusia.


Sipas një prokurori polak në Lublin, hetimet paraprake kanë identifikuar prova të pranisë së tri raketave në lokacione të ndryshme: Nowy Lipowiec, Rudnik dhe Mołodycz, transmeton Telegrafi.

Prokuroria ka bërë të ditur gjithashtu se janë gjetur prova që tregojnë se të tria raketat ishin prodhuar së fundmi në qytetin e Dubnas, në rajonin e Moskës.

Raketat Kh-101 janë raketa ruse të lundrimit, të cilat përdoren për goditjen e objektivave në distanca të mëdha.

Autoritetet polake po vazhdojnë hetimet për të përcaktuar rrethanat e plota të incidentit, ndërsa gjetjet e deritanishme po përdoren për të mbështetur pretendimin se raketat kanë origjinë ruse. /Telegrafi/